Քիչ առաջ ողջ Գյումրին` քաղաքի պաշտոնյաներով, շարքային քաղաքացիներով, ԱԺ ԲՀԿ-ական պատգամավոր Մարտուն Գրիգորյանի թիմով, ծերերով ու երեխաներով դիմավորեցին հունահռոմեական ոճի ըմբշամարտի աշխարհի չեմպիոն Արթուր Ալեքսանյանին` «Սպիտակ արջին»:
Աննկարագրելի էր Գյումրու քաղաքապետ Սամվել Բալասանյանի ուրախությունը. վերջինս քաղաքի մուտքի մոտ փաթաթվելով Գյումրիին փառք բերած ըմբիշին, բացականչեց. «Հը քաղաքը ո՞նց է, հո կրիմինալ չէ, սա սպորտի, արվեստի, մշակույթի քաղաք է, մոռացեք էդ կրիմինալ բառը, տեսաք աշխարհի չեմպիոն տվեցինք»:
Այնուհետ քաղաքապետը չեմպիոնին ուղեկցեց ֆայտոն ու մեքենաների հսկա շարասյունով, երգով ու ազդանշաններով նրան տարան Վարդանանց հրապարակ: Ամբողջ ճանապարհին երգում էին. «Դռները բացեք, սպիտակ արջն է գալիս»:
Կարդացեք նաև
Վարդանանց հրապարակում իսկական տոն էր, թվում էր, թե քաղաքում մի մեծ հարսանիք է. բոլոր բնակիչները` նույնիսկ սայլակին գամված մարդիկ, եկեղեցու մուրացկանները շտապում էին մոտենալ ու ողջագուրվել չեմպիոնի հետ: Նույնիսկ Գյումրու քաղաքապետարանի շենքի դիմաց մեծ սպիտակ արջ էին կանգնեցրել Արթուր Ալեքսանյանի պատվին:
Արթուրի հայրը`Գևորգ Ալեքսանյանը, որը նրա անձնական մարզիչն է, հուզմունքից չէր կարողանում խոսել: Մեզ հետ զրույցում նա ասաց, որ անչափ հուզված է քաղաքի բնակիչների դիմավորելու ձևից: «Չեմ կարող բառերով արտահայտել, թե ինչ եմ զգում», -ասաց Գևորգ Ալեքսանյանը:
Երկար ժամանակ գյումրեցիները չէին թողնում, որ Արթուրը հեռանա, լուսանկարվում էին նրա հետ, կանգնեցնում, գրկում, փաթաթվում էին: Իսկ համեստ չեմպիոնը ոչ մեկին չէր մերժում, կանգնում ու բոլորի բարեմաղթանքները հատ-հատ լսում էր:
Նունե ԱՐԵՎՇԱՏՅԱՆ
Բայց բալասանյանը ինչ կապ ունի չեմպիոն տալու հետ? չեմպիոն տվել է Արթուրի հայրը՝նրա մարզիչը, իսկ բալասանյանը Հրանտ Բագրատյանի ասած բախտիկյանն է, որ ով ինչ անի, իրան է վերագրում, բա մինչև քաղաքապետ նշանակվելդ , որպես դեպուտատ ինչու հրապարակային չէիր հպարտանում?դե լավ , դրա մասին հաջորդ դասին, բայց, իհարկել,Արթուրի ու Լևոն Ջուլֆալակյանի մարզական սխրանքը հայրենանվեր գործ է, բայց հեչ մի ղեկավար իրան լավ չզգա իրանց սխրանքի ստվերում
Միանգամայն համամիտ եմ Համլետի հետ: