ՀՀ ԱԺ արտաքին հարաբերությունների մշտական հանձնաժողովի նիստում Արտակ Զաքարյանի նախագահությամբ քննարկվել է 2014 թվականի հունիսի 3-ին Բրյուսելում ստորագրված «Հայաստանի Հանրապետության պաշտպանության նախարարության եւ Իտալիայի Հանրապետության պաշտպանության նախարարության միջեւ Լիբանանում Միավորված ազգերի ժամանակավոր ուժերի շրջանակներում համագործակցության եւ աջակցության մասին» տեխնիկական համաձայնագիրը:
Հիմնական զեկուցող, ՀՀ պաշտպանության նախարարի տեղակալ Արա Նազարյանը նշել է, որ համաձայնագրի դրույթների համաձայն՝ ՀՀ զինված ուժերի հետեւակային դասակը մինչեւ 30 զինծառայողի եւ 2 սպայի կազմով հատկացվելու է Լիբանանում Միավորված ազգերի ժամանակավոր ուժերի իտալական զինված ուժերի ստորաբաժանմանը: Նաեւ սահմանվում են հայկական զորախմբի զինծառայողների կարգավիճակը, նրանց կազմը, առաջադրված խնդիրներն ու գործառույթները, գտնվելու ժամկետը, ֆինանսավորման հարցերը եւ այլն:
Քննարկված համաձայնագիրը հանձնաժողովի դրական եզրակացությամբ կներկայացվի խորհրդարանի վավերացմանը:
Նիստում ԱԺ պատգամավոր Զարուհի Փոստանջյանը ներկայացրեց իր հեղինակած «Լեռնային Ղարաբաղի (Արցախի) եւ Հայաստանի Հանրապետությունների անվտանգության ապահովման ռազմաքաղաքական հիմնադրույթների հայեցակետերի մասին» որոշման նախագիծը: Քննարկումից հետո հանձնաժողովի նախագահ Արտակ Զաքարյանի առաջարկով հեղինակը համաձայնեց հետաձգել որոշման նախագծի քննարկումը մինչեւ մեկ տարի ժամկետով:
Կարդացեք նաև
ՀՀ ազգային ժողով
