Այս տարին Տիգրան Մանսուրյանի համար հոբելյանական է: Մաեստրոն 75 տարեկան է:
Եղբորը նվիրված հոբելյանական միջոցառումներին որոշել է մասնակցություն ունենալ նաև անվանի օպերային երգչուհի, սոպրանո Արաքս Մանսուրյանը:
Նա Հայաստանում է իր երեք աշակերտների՝ տենոր Ջիանգ Հոնգշինի, կոլորատուր սոպրանո Ջեորջիա Կոկկորիսի և սոպրանո Ռիան Սաունդերսի հետ, որոնք այսօր երեկոյան «Գաֆեսճյան» արվեստի կենտրոնում կայանալիք հոբելյանական համերգին կկատարեն բացառապես հայկական գործեր:
«Շատ դժվար էր աշակերտներիս համար հայերեն սովորելը, քանի որ հայերենը հեշտ լեզու չէ, բայց նրանց ասել եմ, որ եթե բառերը չհասկանան, չեն կարողանա երգը հոգով երգել: Հոգիները հանել եմ, որ հայեցի հնչողություն, մաքուր հայերեն լսենք: Կարծում եմ՝ դա մեզ հաջողվել է»,- այսօր լրագրողների հետ հանդիպման ժամանակ ասաց Ա. Մանսուրյանը՝ ուրախությամբ հավելելով, որ իր սաները մեծ ոգևորությամբ են ընդունել հայերեն սովորելու, հայերեն երգելու, Հայաստանում ելույթ ունենալու իր առաջարկը և որ Հայաստան գալուց հետո էլ շատ տպավորված են մեր երկրով. «Ես նրանց ասացի նաև, որ ֆինանսապես Հայաստանը չի կարող իրենց օգնել: Եթե ուզում են գալ Հայաստան, պիտի իրենց աշխատավարձից խնայեն ու տոմս գնեն: Նրանք մեծ սիրով համաձայնեցին, միայն թե գային: Եկել են և կկատարեն Կոմիտաս, Մանսուրյան, Վ. Տերյանի, Հ. Սահյանի վոկալ շարքերը, Քուչակի հայրենները, ինչպես նաև եվրոպական արիաներ»,- ասաց երգչուհին:
Կարդացեք նաև
«Երբ նոր էի փորձում հայերեն սովորել, դա շատ բարդ ու անհաղթահարելի մի բան էր թվում ինձ, բայց երբ սկսեցի Տիգրան Մանսուրյանի գործերը սովորել, իմ և հայերենի միջև եղած անջրպետն անհետացավ: Եվ հիմա հպարտ եմ, որ ծանոթ եմ Մանսուրյանի, Կոմիտասի գործերին ու պիտի հենց հայերենով ներկայացնեմ դրանք: Դա բոլորովին այլ զգացողություն է: Ես ամեն անգամ փշաքաղվում եմ Տ. Մանսուրյան կատարելիս»,- ասում է Ա. Մանսուրյանի հետ Հայաստան ժամանած երգիչներից Ջիանգ Հոնգշին (Չինաստան):
Ազգությամբ հույն երգչուհի Ջեորջիա Կոկկորիսն էլ վստահ է, որ Մանսուրյանի գործերը կատարելու համար դրանք պիտի արյանդ միջով անցկացնես, կլանես յուրաքանչյուր բջջով. «Ինձ համար շատ կարևոր է հայկական երաժշտությունը ներկայացնել հենց հայերենով. այդպես զգացողություններն ավելի իրական են»,- ասում է երգչուհին:
Եվ վերջում, անդրադառնալով իր ստեղծագործական կյանքին, Ա. Մանսուրյանը նշեց, որ հիմա դժվար շրջան է իր համար, քանի որ աշակերտների թիվը գնալով ավելանում է. «Դա ինձ ինչ-որ տեղ խանգարում է երգել,- ասում է սոպրանոն,- պիտի կամ դասավանդես, կամ երգես, երկուսը միասին չի լինում»:
Ինչ վերաբերում է Ա. Մանսուրյանի և իր աշակերտների համերգներին, դրանք այսօրվա համերգով չեն ավարտվում: Հաջորդը հոկտեմբերի 18-ին է Արցախում, որը դարձյալ նվիրվում է մաեստրոյի 75-ամյակին:
Սիրանուշ ՀԱՅՐԱՊԵՏՅԱՆ
Շնորհակալ եմ հետաքրքիր հոդվածի համար: Արաքսյան մեր 118 դպրոցի երգչախմբի մենակատարն էր եվ ի շնորհիվ նրա գեղեցիկ ձայնի եվ երգչախմբի ղեկավար, արժանահիշատակ պարոն Գրքաշարյանի մեր երգչախումբը համարվում էր Երեվանի ամենալավ դպրոցական երգչախմբերից մեկը: