Այսօր «Մեդիա» կենտրոնում քաղաքացիական ակտիվիստները քննարկում էին, թե որքանով են ոստիկանության գործողությունները օրինաչափ ակցիաների ժամանակ:
«Դեմ եմ» նախաձեռնության անդամ Դավիթ Մանուկյանը նկատել է, անպայման միջադեպեր ու բախումներ ստեղծելու ոստիկանների սովորությունը: Նրա տպավորությամբ ոստիկաններն իրենց գործողություններով սկսել են նմանվել թաղային հեղինակություններին. «Ակցիաների ժամանակ գնահատում են հակառակորդի`տվյալ դեպքում ակցիայի մասնակիցների քանակը ու որոշում են` ինչ քայլերի գնան: Եթե հավաքի մասնակիցների թիվը մեծ է, ոստիկանները զուսպ են ու լկտի չեն դրսեւորում իրենց, իսկ երբ մասնակիցները փոքրաթիվ են, մի տեսակ թեւեր առածի պես են իրենց պահում, քաղաքացու հետ խոսում են ինչպես ուզում են: Օրինակ՝ հենց նոյեմբերի 12-ին ոստիկաններից մեկը ակցիայի մասնակիցներից մեկի վրա գոռալով ասում էր` «ոնց ուզում եմ հետդ խոսում եմ արա, եղա՞վ»: Պարոն Գասպարյանը շատ հաճախ է հայտարարում, որ ոստիկանը փոխվել է, պարոն Գասպարյան իրականություն վերադարձեք, որովհետեւ ոստիկաններն իրենց դրսեւորում են որպես թաղային հեղինակություն ոչ թե իրավապահներ»:
Նա պատմեց, թե նոյեմբերի 12-ին ֆինանսների նախարարության շենքի դիմաց ոստիկաններն ինչ անօրինական գործողություններ կիրառեցին «Դեմ եմ»-ի ակցիայի մասնակիցների նկատմամբ.« Կարեն Մովսիսյանը, նախարարության շենքին մեզ թույլ չտալու որոշումը, հիմնավորում էր, թե ոստիկանությունը պետք է կանխի նախարարության բնականոն աշխատանքը, բայց հավաքների ազատության մասին օրենքում նման կետ էլ չկա, որ բնականոն ընթացքը պետք է պահեն, մեր խաղաղ հավաքը խոչընդոտելով, մի աբսուրդ հիմնավորում էր, իբր կխանգարե՞ինք նախարարի աշխատանքը մեր աղմուկով: Հաջորդ հիմնավորումը, թե խանգարելու ենք ազատ ելումուտը քաղաքացիների: Բայց ստացվում է` ոստիկաններն իրենց իշխանություն են վերապահում խոչընդոտել մեր ակցիան, որոշում են` մեր մոտենալը կխանգարի ելումուտը, հետո ասում են, եթե համաձայն չեք կբողոքարկեք մեր որոշումը դատարանում: Այսինքն` ակցիան չկայանա, իմ ազատ տեղաշարժման իրավունքը խանգարվի, որ հետո ես դատական ակտով բողոքարկե՞մ:
Արփինե ՍԻՄՈՆՅԱՆ
Կարդացեք նաև
Լուսանկարը՝ «Մեդիա» կենտրոնի
