ՀՀ ԱԺ-ն ընդունեց «Ժամանակավոր անաշխատունակության նպաստների մասին» ՀՀ օրենքում փոփոխություններ կատարելու՝ ՀՀ կառավարության որոշումը:
Մինչ քվեարկությունը ՀՅԴ, ԲՀԿ, ՕԵԿ խմբակցությունների ներկայացուցիչները հայտարարեցին, թե չեն մասնակցելու քվեարկությանը:
ՀՅԴ խմբակցության պատգամավոր Արծվիկ Մինասյանը հայտարարեց. «Քանի որ մենք դեմ ենք ժամանակավոր անաշխատունակության մասին օրենքում կատարվելիք փոփոխություններին, ՀՅԴ-ն չի մասնակցելու քվեարկությանը»:
ԲՀԿ խմբակցության քարտուղար Նաիրա Զոհրաբյանը հայտարարեց. «Պաշտոնյաների կանայք 10,20, 30 միլիոն դրամի նպաստներ են ստացել, ինչի մասին բազում մտահոգություններ կան: ԲՀԿ-ն ևս չի մասնակցի այս հարցի քննարկմանը, մինչև նախագիծը չբերվի այն տեսքին, որ հնարավոր բոլոր ռիսկերը նվազեցվեն»:
Կարդացեք նաև
ՕԵԿ խմբակցության ղեկավար Հեղինե Բիշարյանը հայտարարեց, թե իրենց առաջարկություններն էլ չեն ընդունվել, ուստի իրենք էլ չեն մասնակցի քվեարկությանը:
ՀՀԿ խմբակցությունից Հակոբ Հակոբյանը, արձագանքելով Նաիրա Զոհրաբյանին ասաց. «Նաիրա Զոհրաբյանն արտահայտվեց ոչ ճիշտ, քանի որ այս փոփոխություններով ունենք սահմանափակում և բարձրաստիճան պաշտոնյա կանայք այլևս այդ գումարը չեն ստանա…եթե դեմ եք, որ մայրերը չաշխատեն ու գումար ստանան, դեմ քվեարկեք»: ԲՀԿ խմբակցության պատգամավոր Գուրգեն Արսենյանը շեշտեց, թե ինքը կողմ է քվեարկելու:
Քվեարկության արդյունքում «կողմ» ձայների մեծամասնությամբ ՀՀ ԱԺ-ն ընդունեց ՀՀ կառավարության որոշումը:
Տաթև ՀԱՐՈՒԹՅՈՒՆՅԱՆ
