Հռոմի պապ Ֆրանցիսկոսի Թուրքիա կատարած եռօրյա այցելության ծրագրում հայկական մաս չկար, բայց դեպի Իտալիա վերադարձի ճանապարհին՝ մինչ օդանավակայան մեկնելը, նա այցել է Ստամբուլի «Սուրբ Փրկիչ» հայկական հիվանդանոց, որտեղ պառկած է Պոլսո հայոց պատրիարք Մեսրոպ արքեպիսկոպոս Մութաֆյանը:
2008 թվականից պատրիարքը գտնվում է հիվանդանոցում՝ բժիշկների մշտական խնամքի տակ: Վեց տարի առաջ նրա առողջական վիճակը խիստ վատթարացել էր, նա տառապում է տկարամտությամբ, հիշողության կորստով:
Հայոց պատրիարքին Հռոմի պապի այցելության մասին հաղորդել է Վատիկանի պաշտոնական ռադիոն:
«Ռադիո Վատիկան»-ը տեղեկացնում է, որ վերադարձի ճանապարհին՝ օդանավում, Հռոմի պապը անդրադարձել է նաև մի հարցի, որը զարմանալիորեն ուշադրության կենտրոնում չի գտնվել: Եկող տարի լրանում է Հայոց ցեղասպանության 100-րդ տարելիցը, մեկ դար առաջ օսմանյան զորքերի կողմից 1.5 միլիոն հայեր սպանվեցին, մինչդեռ Թուրքիան հերքում է պատմական ողբերգությունը:
Կարդացեք նաև
Հռոմի պապը ասել է, որ նախագահ Էրդողանը վերջերս հիշատակել է այդ դեպքերը՝ հավելելով, թե ցանկացած նման փորձեր դրական են, որքան էլ դրանք փոքր լինեն:
«Հյուրիեթ Դեյլի Նյուզ»-ը, հղում անելով Catholic News Service ծառայությանը, փոխանցում է, որ Հռոմի պապը հայ-թուրքական սահմանի բացման մասին հույս է հայտնել՝ նշելով, որ 1915 թվականի իրադարձությունների 100-րդ տարելիցը կարող է մերձեցնել երկու երկրներին՝ հույս հայտնելով, որ Թուրքիան կբացի Հայաստանի հետ սահմանը:
Նա գովաբանել է այս տարվա ապրիլի 23-ին Ռեջեփ Էրդողանի հայտարարությունը՝ դա ներկայացնելով որպես պարզված ձեռք:
Մանրամասները կարող եք կարդալ` «Ազատություն» ռ/կ-ի կայքում
