«Դիվանագիտական դելիկատ լեզուն չեն ընդունում Բաքվում, և եռանախագահները համապատասխան եզրակացություն պիտի անեն»,-դիտարկմանը, թե Բազելում կայացած ամենամյա ԵԱՀԿ նախարարական խորհրդի նիստից հետո, Ադրբեջանը կրկին հայտարարություններ է անում, թե հիմնախնդիրը լուծվելու է ռազմական ճանապարհով, այսպես պատասխանեց ՀՀ ԱԳ նախարար Էդվարդ Նալբանդյանը
այսօր ՀՀ ԱԳՆ-ում Լատվիայի արտաքին գործերի նախարար Էդգարս Ռինկևիչսի հետ համատեղ ասուլիսում:
Նա չի բացառում, որ դա Բաքվի պատասխանն էր եռանախագահներին. «Միգուցե դա Բաքվի պատասխանն է եռանախագահներին, որ արվեց Արևելյան գործընկերության երկրների նախարարների խորհրդի շրջանակներում, որի մեջ եռանախագահներն ընդգծում էին, որ ռազմական լուծում հիմնախնդրին լինել չի կարող: Ես ասել եմ, որ միգուցե այդ հայտարարության մեջ ընտրված դիվանագիտական դելիկատ լեզուն ադրբեջանական կողմի համար հասկանալի չէ: Հիմա այդ նոր հայտարարությամբ՝ Ադրբեջանի ՊՆ նախարարի կողմից և այն սրմամբ, որ վերջին շրջանում տեսնում ենք շփման գծում, ևս մեկ անգամ հաստատվում է, որ այդ լեզուն Բաքվի համար ընդունելի չէ»:
Լատվիայի ԱԳ նախարարը նշեց, թե այցելության նպատակն էր ՀՀ-ում քննարկել առաջնահերթությունները, որ լինելու են ԵՄ-ում Լատվիայի նախագահության ժամանակ: Նաև շեշտեց, թե հետաքրքրված է լսել կարծիքներ հայկական կողմից, թե ինչպես ԵՄ-ՀՀ համագործակցությունը կարելի է շարունակել:
Կարդացեք նաև
Այնուհետև հավելեց. «Մենք համաձայն ենք, որ Ռիգայի գագաթաժողովը կարող է լինել մի կարևոր փուլ, որտեղ Արևելյան գործընկերության երկրները ավելի շատ անհատական փոխհարաբերություններ կզարգացնեն ՀՀ-ի հետ: ՀՀ-ի հետ տեսնում ենք, որ կարող ենք մի այնպիսի համագործակցության ձև ընտրել, որ ՀՀ-ի համար՝ որպես ԵՏՄ-ին անդամակցած երկիր, շահավետ դառնա»:
Լատվիայի ԱԳ նախարարը խոսեց նաև այս հարցում ճանապարհային քարտեզի անհրաժեշտության մասին, որ նոր պայմանագիր ստեղծվի և շարունակվի երկխոսությունը:
Տաթև ՀԱՐՈՒԹՅՈՒՆՅԱՆ
