Ժամը 12.45-ից մինչ 15.00-ն Կոտայքի մարզի դատարանում ավարտվեց Վարդան Պետրոսյանի պաշտպան Նիկոլայ Բաղդասարյանի ճառը: Նա նշեց այս գործով տասնյակ չփարատված կասկածների մասին: Պաշտպանն ասաց, որ չի հավատում, որ դեպքի վայր ժամանած փորձագետը, քննիչը չեն նկատել BMW ավտոմեքենայի անիվների հետքերը, «Նիվայի» ետեւի անիվների թեքությամբ կողնակում թողած հետքերը: Չի հավատում, որ կա ընթերակա, որն իբրեւ ներկա է եղել:
Անդրադառնալով քաղհայցին եւ պատժի չափին, նա ասաց, որ գյուղնախարարության ԾԻԳ-ի ներկայացրած հայցը անհիմն է, «Նիվա» ավտոմեքենան 2 մլն-ից ավելի չի գնահատվում եւ որ վնասի հատուցման պարտականությունն էլ ընկած է ապահովագրական ընկերության վրա:
Ինչ վերաբերում է տուժողի բուժման համար 8 մլն դրամ գումարի պահանջին, նա ասաց, որ ապահովագրական ընկերությունը դեռ պետք է տա 1 մլն 800 հազարը եւ որ իրեն բուժկենտրոնից պարզաբանել են, որ տուժող Տաթեւիկ Հակոբյանը 15 օր (15.000 դրամ յուրաքանչյուր օրը) պետք է բուժում ստանա եւ 4 ամիս հետո կրկնի կուրսը: 8 մլն-ի դեպքում ինքը կդիմի անհարկի հարստացման դեմ հայցով դատարան:
Իսկ փաստաբանի կողմից 2 մլն 600 հազար դրամի պահանջը նա նույնպես որակեց օրենքից չբխող, հղում արեց փաստաբանական պալատի որոշմանը, ասելով, որ պահանջվող գումարը չի կարող համարվել անմիջականորեն հասցված վնաս:
Կարդացեք նաև
Դատարանում սկսվեց Սամվել Ջաղինյանի պաշտպանական ճառը:
Ռուզան ՄԻՆԱՍՅԱՆ
