Փետրվարի 2-ին Տավուշի մարզի Բերդի տարածաշրջանի սահմանամերձ Վերին Կարմիրաղբյուր գյուղի բնակիչ, 23-ամյա Արսեն Խոջոյանը բուժման նպատակով տեղափոխվել է Երեւան:
Վերին Կարմիրաղբյուրի գյուղապետ Կամո Չոբանյանի տվյալներով` նա բուժում է ստանում «Արմենիա» բժշկական կենտրոնում:
Զանգվածային լրատվության որոշ միջոցներով տեղեկություններ են տարածվել, որ Արսենը կաթված է ստացել, դեղորայքի պակաս է զգում: Արսենի մայրը՝ տիկին Սվետլանան մեզ հայտնել է, որ Արսենի կաթված ստանալու մասին լուրը ճիշտ չէ եւ խնդրել հերքել այն: Նա ասաց, որ Արսենը նյարդային որոշ խնդիրների պատճառով դժվարանում է տեղաշարժվել:
Արսեն Խոջոյանը նաեւ մաշկի հիվանդություն ունի, դեղորայք է ընդունում: Սվետլանա Խոջոյանը հայտնեց, որ ՀՀ առողջապահության նախարարությունը Արսենի համար դեղորայք է ուղարկում:
Կարդացեք նաև
Ս. Խոջոյանին հարցրինք իրենց ընտանիքի ունեցած պարտքերի մասին: Նա ասաց, որ իրենց օգնել են պարտքերը մարելու համար, դրանց մի մասը փակվել է, սակայն այլ պարտքեր կան:
Վերին Կարմիրաղբյուրի գյուղապետ Կամո Չոբանյանն ասաց, որ Խոջոյանների ընտանիքը բազմանդամ է՝ 9 հոգուց բաղկացած, հոգսաշատ, Խոջոյանները չեն կարողանում պարտքերից ազատվել:
Սվետլանա Խոջոյանը Վերին Կարմիրաղբյուրի գյուղապետարանի ենթակա հիմնարկում՝ գյուղի մշակույթի տանը հավաքարար է աշխատում:
Ոսկան ՍԱՐԳՍՅԱՆ
