Այսօր «Հայելի» ակումբում քաղաքական գործիչ Գուրգեն Եղիազարյանը հայտարարեց, որ ԲՀԿ անդամ չէ եւ մտադրություն էլ չունի դառնալու:
«Ես դիմում չեմ գրել եւ չեմ դիմել կուսակցությանը: Միայն գրել եմ ֆեյսբուքում: Իմ նպատակը դա չէր, ես դրանով իմ ոչ-ը ասեցի Սերժ Սարգսյանի ելույթին, թե ոնց կարող են մարդուն բարձրացնել եւ հանիրավի սեւացնել: Ես գտա ամենակոնստրուկտիվ ձեւը, օպերատիվ միջամտությունը նախագահի ելույթին, հանդես եկա դիմումով՝ ուղղված Գագիկ Ծառուկյանին: Ես ոչ ասեցի ստին, կոռուպցիային, արձանագրություններին»:
Հիշեցենք, որ Գուրգեն Եղիազարյանը հայտարարություն էր տարածել ԲՀԿ շարքերն անդամագրվելու մասին:
Գուրգեն Եղիազարյանը ԿԳ նախարար Արմեն Աշոտյանին հրավիրեց, որ գան «Հայելի» ակումբ եւ խոսեն համաշխարհային գրականությունից, հայոց պատմությունից. «Պատկերացնում եմ ինչ է լինելու: Նա ինձ ասելու բան չի ունենալու: Միգուցե «Վարդանանքից» մի կցկտուր բան ասի: Ես կարող է շատ գրագետ մարդ լինեմ, ակադեմիաներում փայլուն կրթություն ստացած լինեմ, բայց լինեմ զրոյական մարդ»
Կարդացեք նաև
Ըստ Գուրգեն Եղիազարյանի, չկա չափանիշ, որով կարող են որոշել՝ ով որքանով է մարդ, որովհետեւ երկրի նախագահ լինելու համար երկու բան է անհրաժեշտ՝ կամք եւ մարդկային հատկանիշներ. «Ես ինչու եմ գնահատում Գագիկ Ծառուկյանին՝ այս մարդը ամեն ինչ ունի կյանքում, հարուստ մարդ է ինքը եւ իմանալով ում հետ գործ ունի, այդ ամեն ինչը մի կողմ դրած՝ եկել կանգնել է ժողովրդի կողքին: Հիմա որոշում են, թե ոնց պախարակեն, ոնց հերն անիծեն Գագիկ Ծառուկյանի, որովհետեւ համարձակվել է դեմ գնալ»:
ԲՀԿ-ից «առնետավազքի» մասին խոսելիս պարոն Եղիազարյանն ասաց. «Հարյուր հազարանոց կուսակցությունում երկու հոգին թիվ չեն. «Սա կրիզիս է, որի միջից ԲՀԿ-ն ավելի ու ավելի կայտառ, հզոր դուրս կգա՝ ճնշումներից հետո: Կազատվեն կասկածողներից եւ կմնան նրանք, ովքեր իրապես կուսակցական են»:
Մեր հարցին՝ ի՞նչը հունից հանեց Սերժ Սարգսյանին՝ Գուրգեն Եղիազարյանը վստահեցրեց՝ վախը:
Հռիփսիմե ՋԵԲԵՋՅԱՆ
