Կենտրոն եւ Նորք-Մարաշ վարչական շրջանների ընդհանուր իրավասության դատարան էր դիմել Գերագույն խորհրդի նախկին պատգամավոր, «Ղարաբաղ» կոմիտեի անդամ Սամսոն Ղազարյանը: Այսօր դատավոր Էդիկ Ավետիսյանի նախագահությամբ պետք է լսվեր ընդդեմ Գերագույն խորհրդի նախկին պատգամավոր, գործարար Մեխակ Գաբրիելյանի, Ռուբեն Մինասյանի «Էտոն թրայն» ՍՊԸ- «Գլոբալ Հաուսի» (Լոնդոն) գործի քննությունը: Սակայն պատասխանողները դատարան չէին ներկայացել, իսկ Սամսոն Ղազարյանը միջնորդեց, որպեսզի դատարանը նրանց ներկայությունն ապահովի:
Այս գործով Սամսոն Ղազարյանի լիազոր-ներկայացուցիչն է ՀՀ փաստաբանների պալատի անդամ Վարդան Զուռնաչյանը: Aravot.am-ին Ս. Ղազարյանը տեղեկացրեց, որ դեռեւս 2011թ. հունիսի 7-ին Կենտրոն դատարանի կողմից տրված կատարողական թերթի պահանջի հիման վրա որպես հայցի ապահովում հայցագնի չափով արգելանք պետք է դրվեր Մեխակ Գաբրիելյանին պատկանող գույքի եւ դրամական միջոցների վրա: Ի դեպ, արգելանք է դրվել նախկին պատգամավորին պատկանող մի շարք՝ «Վան ՀԷԿ», «Աբգամ», «Տասման», «Գոլդեն ֆիլդ», «Էկոտրակ», «Գաբսաս» եւ այլ ՍՊ ընկերությունների դրամական միջոցների վրա: Ըստ դատարան ներկայացված հայցադիմումի՝ տեղեկացվում էր նաեւ, որ կատարողական գործողությունների արդյունքում պարզվել է, որ Մ. Գաբրիելյանը հանդիսանում է 10 տնտեսվարող սուբյեկտների հիմնադիր-մասնակից: 2013թ. հոկտեմբերի 29-ին Մեխակ Գաբրիելյանի, այս գործով պատասխանող ճանաչված նաեւ Ռուբեն Մինասյանի եւ «Էտոն թրայն» ՍՊԸ-ի միջեւ կնքվել է առուվաճառքի պայմանագիր: Ըստ Սամսոն Ղազարյանի՝ չնայած կատարվել են կատարողական գործողություններ, արգելանք է դրվել Գաբրիելյանին պատկանող գույքի վրա, սակայն իր օգտին որեւէ գումար չէր բռնագանձվել:
Ս. Ղազարյանը պահանջելու է անվավեր ճանաչել վերոհիշյալ առուվաճառքի պայմանագիրը եւ նկատի ունենալով, որ պարտապան Մեխակ Գաբրիելյանը օտարել է արգելանքի տակ գտնվող գույքը, ինչն անելու իրավունք նա չուներ՝ օրենքի համաձայն, ուստի պահանջվում է «Էտոն թրայն» ՍՊԸ-ի գրանցումը նույնպես անվավեր ճանաչեն: «Մեխակ Գաբրիելյանը իմանալով, որ իրեն պատկանող գույքը գտնվում է արգելանքի տակ, այն անօրինական օտարել է երրորդ անձի, որպեսզի կարողանա խոչընդոտել եւ անհնարին դարձնել դատարանի վճռով իրենից գումարի բռնագանձումը»,- ասում է Ս. Ղազարյանը: Ի դեպ, պայմանագրի առարկա հանդիսացող բաժնեմասերի ընդհանուր գինը կազմել է 180 մլն 467 հազար ՀՀ դրամ (444.500 ԱՄՆ դոլարին համարժեք):
Դատական հաջորդ նիստը նշանակվեց մայիսի 26-ին:
Կարդացեք նաև
Ռուզան ՄԻՆԱՍՅԱՆ
