Ապրիլի 2-ը մանկական գրքի միջազգային օրն է, որը նշվում է նաև Հայաստանում
«Հայաստանում մանկական գիրք հրատարակելը շահութաբեր է ինչպես հրատարակչությունների, այնպես էլ գրախանութների համար»,- համոզված է գրականագետ Արքմենիկ Նիկողոսյանը, քանի որ, նրա դիտարկմամբ, ծնողները շահագրգռված են, որ իրենց երեխաները գիրք կարդան. «Նրանք կարող են իրենց շատ բաներից զրկել, բայց իրենց երեխաներին գրքերից չեն զրկում: Այնպես որ, վստահաբար կարելի է ասել, որ մանկական գրականության պահանջարկը մեծ է, և գրախանութներում դրանք ամենապահանջված գրքերն են»:
Գրականագետն այսօր լրագրողների հետ հանդիպման ժամանակ ասաց, որ մանկական գրքի հրատարակման իմաստով Հայաստանում, կարծես թե, խնդիր չկա. «Բազմաթիվ մանկական գրքեր են տպագրվում պետպատվերով, ամեն տարի անցկացվում է նաև Մանկական գրքի շաբաթ, որի ընթացքում մանկագիրները մրցանակներ են ստանում: Չպետք է մոռանալ նաև այն, որ նախկինում մեր արտադրանքն էապես զիջում էր, և շատերը նախընտրում էին այս կամ այն գիրքը կարդալ, օրինակ, ռուսերենով: Բացի այդ, այսօր արդեն հայերենով ունենք աշխարհում մեծ պահանջարկ ունեցող խոսող, երգող և այլ էֆեկտներ ունեցող գրքեր, որոնք գնային առումով մեզ մոտ անհամեմատ ավելի մատչելի են»,- ասում է Արքմենիկ Նիկողոսյանը:
Նրա խոսքով՝ մենք այսօր նոր մանկագիրներ ի հայտ բերելու, ձևավորելու ուղղությամբ աշխատանք տանելու խնդիր ունենք. «Հրատարակիչների խնդիրը պետք է լինի նոր անունների ներգրավումը, թարգմանություններից ու նմանակումներից անցումը բուն հայկական բովանդակությամբ գրքերի: Մեր գրողներն էլ պետք է «թարմացնեն» իրենց: Այսօրվա հեքիաթների հերոսները ոչ թե պետք է գնան անհնարին բաներ հաղթահարելու, այլ դեպի այդտեղ տանող ճանապարհն ավելի գունեղ դարձնելու»,- ասաց գրականագետը և հավելեց, որ մանկական գրականությունն այսօր նաև ձևի ու բովանդակության հետ կապված խնդիր ունի, այսինքն՝ կան լավ ձևավորած գրքեր, որոնք վատ բովանդակություն ունեն, և հակառակը:
Կարդացեք նաև
Սիրանուշ ՀԱՅՐԱՊԵՏՅԱՆ
