Ինչո՞ւ են հայ տղամարդիկ «լեւի» գնում, անկախ նրանից, որ իրենց կողքին ունեն սիրելի կին Aravot.am-ի այս հարցին ի պատասխան՝ սեքսապաթոլոգ Վրեժ Շահրամանյանն ասաց` ամուսնանալով՝ երբեմն տղամարդու ակնկալիքները սեռական կյանքում չեն իրականանում:
Այսօր «Հայելի» ակումբում տեղի ունեցած ասուլիսում Վրեժ Շահրամանյանը թվարկեց «լեւի» գնալու մի քանի պատճառ. «Երբ հարցնում եմ որն է պատճառը, նշում են` սովորությունը, ամուսնանալուց հետո էլ այդ սովորությունը պահպանվում է, այսինքն` ամուսնանալով, ընտանիքում չստանալով այն, ինչ սովոր են տեսնել, սկսում են գնալ «ձախ», որպեսզի այդ ամենը զգան ու վայելեն: Տղամարդիկ էլ կան, որոնք ինքնահաստատման համար են գնում, տղամարդիկ դրանից հետո կարծես ինքնահաստատվում են: Իսկ ամենաշատ նշվող պատճառն այն է, որ ակնկալիքներն ու ցանկությունները չեն իրականանում»:
Ասուլիսի մեկ այլ բանախոս՝ գինեկոլոգ Լիլիթ Կուջոյանի կարծիքով, ամեն ինչ գալիս է տղամարդու կրթվածության մակարդակից. «Կրթված տղամարդը կարողանում է այնպես անել, որ իր սեռական կյանքը լինի այնպիսին, ինչպիսին իրեն է պետք: Իսկ մեր հայ տղամարդիկ կոմպլեքսավորվում են իրենց կանանց հետ լինեն բաց, ազատ եւ դրա համար այն ամենը, ինչ որ ուզում են ստանալ սեռական կյանքում, իրենք փնտրում են մարմնավաճառների մոտ: Տղամարդը պետք է կարողանա այնպես անել, որ իր սիրելի կինը նրա սեռական զուգընկերուհին լինի` նրա համար լինի ամեն ինչ, ինչ որ նա ուզում է»:
Վրեժ Շահրամանյանի խոսքերով, բոլոր նշված պատճառներն էլ մասնագետների կողմից ընդունելի չեն, նույնիսկ մերժելի են. «Մենք բացատրում ենք, որ ինտիմ հարաբերություններում կինը պետք է առաջին հերթին դիտարկվի ամենամտերիմ էակը եւ սեռական հարաբերությունները պետք է կառուցեն միասին եւ անկողնում միայն չպետք է բավարարվի տղամարդը կամ` հակառակը, սեռապես պետք է բավարարված լինեն երկուսն էլ»:
Կարդացեք նաև
Մասնագետները նշեցին, որ կանանց առօրյա հոգսերը խոչընդոտում են, որ կինը ապրի լիարժեք սեռական կյանքով, եւ տղամարդուց մեծ ջանքեր է պահանջվում, որպեսզի կինը անկողնում ազատ լինի այդ հոգսերից եւ թուլանա: Ըստ բժիշկների, տղամարդու մոտ ավելի շատ ֆիզիոլոգիական է սեռական պահանջը, այդ իսկ պատճառով տղամարդն իր առօրյան չի տեղափոխում անկողին:
Լուսինե ԲՈՒԴԱՂՅԱՆ
