Ադրբեջանի Գյանջայի ծանր հանցագործությունների գործերով դատարանում այսօր ավարտվել են անցած տարվա դեկտեմբերի 26-ին Ադրբեջանում գերի ընկած Լեռնային Ղարաբաղի պաշտպանության բանակի նախկին զինծառայող Արսեն Բաղդասարյանի գործով դատական լսումները:
Ադրբեջանական «Апа» գործակալության փոխանցմամբ՝ Արսեն Բաղդասարյանը դատապարտվել է 15 տարվա ազատազրկման: Ադրբեջանի դատախազությունը պահանջել էր Բաղդասարյանին դատապարտել 18 տարվա ազատազրկման:
Հիշեցնենք, որ ավելի վաղ ադրբեջանական լրատվամիջոցները հղում անելով այդ երկրի ռազմական գերատեսչությանը՝ հաղորդել էին, թե իբր դեկտեմբերի 26-ին` երեկոյան, ազերիների զինուժը կանխել է Աղդամի ուղղությամբ հայկական հետախուզական խմբի առաջխաղացումը, որի հետեւանքով պրոֆեսիոնալ զինվորական Արսեն Էդուարդի Բաղդասարյանը գերվել է:
Ավելի ուշ իր տարածած հաղորդագրություն պաշտպանության բանակը հերքել էր դիվերսիայի մասին լուրը եւ նշել, որ Արսեն Բաղդասարյանը հանդիսանալով ՊԲ պայմանագրային զինծառայող, պարբերաբար ինքնակամ լքել է իր մշտական տեղակայման վայրը, որի համար հրամանատարության որոշմամբ, կարգապահական խախտումներ կատարելու հիմնավորմամբ, ժամանակավորապես հեռացված է եղել ծառայությունից:
Կարդացեք նաև
Պատրաստեց Աշոտ ԻՍՐԱԵԼՅԱՆԸ