«Վիճակը կատաստրոֆիկ է»,- այսօր ԱԺ նիստում հայտարարեց ՀԱԿ խմբակցության պատգամավոր Հրանտ Բագրատյանը՝ խոսելով էլեկտրաէներգիայի սակագնի բարձրացման հայտի մասին:
Նա ասաց, որ ՀԷՑ-ը, «Նաիրիտը», «ՀայՌուսգազարդը» մոտ 1 մլրդ դոլարի պարտք ունեն, երբ ՀՀ պետական պարտքը 6 մլրդ դոլար է. «Ուզում եմ փնովել: Երբ մենք ասում ենք, որ երաշխիք են տալիս պետության անունից, եկեք այդ երաշխիքներն էլ պառլամենտում հաստատենք, որովհետեւ դրանք պարտք են: Կառավարությունը հայտնվել է դժվար իրավիճակում, որովհետեւ խնդիրը պիտի լուծվի: Մենք կարիք չունենք Ռոբերտ Նազարյանին բերել այստեղ, նույնիսկ լսել նրան: Նա ոչինչ չի կարողանում ասել»:
Հրանտ Բագրատյանը վստահեցրեց, որ Ռոբերտ Նազարյանը հարց լուծող չէ եւ էլեկտրաէներգիայի սակագնի բարձրացումը տնտեսության անկում է բերելու 10-15 տոկոս:
ՀԱԿ խմբակցության ղեկավար Լեւոն Զուրաբյանն էլ պահանջեց, որ հարցը քննարկվի ԱԺ լիագումար նիստում. «ՀԷՑ-ի գողության պատճառով կուտակված պարտքը փորձում են ժողովրդի ուսերին դնել: Եվ մենք պետք է ԱԺ նիստում քննարկենք դա»: Նա փորձեց տեղեկացնել, որ ձեւաթուղթ են վերցրել՝ 44 ստորագրություն հավաքելու եւ արտահերթ նիստ հրավիրելու համար, սակայն Գալուստ Սահակյանը անջատել տվեց նրա խոսափողը՝ հորդորելով խոսել միայն օրակարգի մասին:
Կարդացեք նաև
Չանսալով Գալուստ Սահակյանի հորդորին՝ «Ժառանգության» պատգամավոր Զարուհի Փոստանջյանը եւս մեկ անգամ պատասխան պահանջեց ԱԺ նախագահից, թե ինչու Սուրիկ Խաչատրյանի գործունեության մասին ԱԺ հայտարարության իր նախագիծը չի դնում շրջանառության մեջ:
Զարուհի Փոստանջյանի հայտարարությունը թեժացրեց դահլիճում մթնոլորտը: Գալուստ Սահակյանն անջատել տվեց նաեւ Փոստանջյանի խոսափողը, տեղից սկսեց բղավել գեներալ Սեյրան Սարոյանը: Հետո Զարուհի Փոստանջյանին սկսեց քննադատել ՀՀԿ սյունեցի պատգամավոր Հայկ Գրիգորյանը՝ «Իմ գործընկերն իրեն դրել է ամենայն հայոց դատավորի տեղը եւ անվայել արտահայտություններ է անում մարզպետի հասցեին»:
Գալուստ Սահակյանն անջատել տվեց նաեւ նրա խոսափողը: Բայց կրքերը չէին հանգստանում: Իսկ դահլիճում մեծ աղմուկ բարձրացավ եւ վեճ եղավ, երբ անջատվեց նաեւ Ժառանգություն խմբակցության ղեկավար Ռուբեն Հակոբյանի խոսափողը:
Ի վերջո, ՕԵԿ-ը 20 րոպե ընդմիջում խնդրեց՝ դահլիճում իրավիճակը վերահսկելի դարձնելու համար:
Հռիփսիմե ՋԵԲԵՋՅԱՆ
