Վազաշեն-Պառավաքար շրջանցիկ ավտոճանապարհի շինարարությունը դեռ չի վերսկսվել: Այդ ճանապարհը կառուցող «Խաչհար» ՍՊԸ աշխղեկ Աբել Ավագյանն ասաց,որ տեղանքը ցեխոտ է, գետինը չի չորացել, այդ պատճառով ճանապարհի կառուցումը չի վերսկսվել: Նրա խոսքերով՝ շրջանցիկ ճանապարհի գործարկումը նախատեսված է մինչեւ հուլիսի սկիզբը, մինչ այդ կփռվի 17000 խորանարդ մետր ասֆալտ,կավարտվի ճանապարհը ադրբեջանական հենակետերից պաշտպանող հենապատի կառուցումը:
Ա.Ավագյանին հարցրինք 2014թ. աշնանը ասֆալտապատված հատվածի քայքայվելու մասին: Նա հայտնեց,որ այդ հատվածը մեծ չէ, իրենք դա կնորոգեն: Շրջանցիկ ավտոճանապարհի խճապատ հատվածում փլվածք է առաջացել: Վազաշենի գյուղապետ Լորիկ Բադիրյանն ասաց, որ մասնագետներ են եկել, այն ուսումնասիրել:
Վազաշեն-Պառավաքար 3.2 կմ երկարությամբ շրջանցիկ ավտոճանապարհի շինարարությունը պետք է ավարտվեր դեռ 2014թ. հունիսին: Այն 1.8 կմ-ով կրճատելու է այդ տարածքում երթեւեկությունը եւ ապահովելու է սահմանամերձ հատվածում երթեւեկի անվտանգությունը դիմացի բարձունքներում գտնվող ադրբեջանական հենակետերից արձակվող կրակոցներից: Այդ ճանապարհի շինարարության մրցույթը շահեց եւ այն կառուցում էր Իջեւանի ՃՇՇ-ն:
2014թ. սեպտեմբերին փոխվեց ճանապարհի կառուցապատողը, գործը տրվեց Երեւանի «Խաչհար» ՍՊԸ-ին: Այդ ընկերությունը պարտավորվել էր մինչեւ 2014թ. հոկտեմբերի վերջ ավարտել ճանապարհի շինարարությունը: Ռազմավարական նշանակության ճանապարհի գործարկումը հրատապ խնդիր է: 2013 թվականի ընթացքում այդ հատվածում ադրբեջանական կրակոցներից 3 զինվորական է զոհվել, եղել է 11 վիրավոր, որից 2-ը՝ քաղաքացիական անձ:
Կարդացեք նաև
Ոսկան ՍԱՐԳՍՅԱՆ
Իմ կարծիքով արդեն բոլորը գիտեն, որ Վազաշեն-Պառավաքար ճանապարհի նորակառույց հատվածն առկա խնդիրը չի լուծում, խոսքն առաջին հերթին անվտանգ երթևեկի ապահովմանն է վերաբերվում: Ակամա հարց է առաջանում, եթե այդ հատվածի շինարարության համար նախատեսված գումարների մի մասը բարձրաստիճան պաշտոնյաների հովանու ներքո ”օտկատների” կամ այլ մեխանիզմների կիրառմամբ չի յուրացվել, ինչու որևէ մեկը պատասխանատվության չի ենթարկվում ստեղծված իրավիճակի և աննպատակ վատնված գումարների համար?: Տավուշեցիներն ի սկզբանե դեմ էին այդ տարբերակին, որին բազմիցս անդրադարձել է նաև հոդվածի հեղինակը, սակայն ոչ-ոք, առաջին հերթին Տավուշի նախկին մարզպետ Ա.Ղուլարյանը, հայտնի պատճառներով հաշվի չառավ:
Վազաշեն-Պառավաքար ճանապարհի նորակառույց հատվածը մեր իշխանությունների պատռված դիմակն է: