Հոլանդիայի պատգամավորը պաշտպանել է Բելգիայի խորհրդարանի թուրք պատգամավորին, որն անցած շաբաթ Հայոց ցեղասպանությունը ժխտելու համար հեռացվել է կուսակցությունից: Այդ պատգամավորը Մահինուր Օզդեմիրն է: Նա Հումանիստ դեմոկրատական կենտրոն կուսակցության (ՀԴԿԿ) անդամն էր, սակայն անցած շաբաթ Օզդեմիրին հանել են կուսակցությունից Հայոց ցեղասպանությունը ժխտելու համար:
Ըստ Anadolu գործակալության՝ Հոլանդիայի թուրքական ծագումով պատգամավոր Թունահան Քուզուն պաշտպանել է Բելգլիայի խորհրդարանի պատգամավորին: «Քաղաքական կուսակցությունները ցանկանում են, որ բոլորը տարբեր հարցերի մասին իրենց նման մտածեն: Դա չի համապատասխանում մարդու իրավունքներին եւ ազատությանը»,- ասել է նա եւ հավելել, թե միայն պատմաբանները եւ գիտնականները կարող են լուծել ցեղասպանության հարցը:
Անցած շաբաթ ՀԴԿԿ նախագահ Բենոիտ Լուտգենը ասել է, որ կուսակցության ցանկացած անդամ, որը կժխտի Հայոց ցեղասպանությունը, կհեռացվի կուսակցությունից: Օզդեմիրն էլ հակադարձել է, թե չի եղել մի դատարանի որոշում, որ կարող է ստիպել 1915 թվականի իրադարձություններն անվանել ցեղասպանությունը:
Նա նշել է, որ կուսակցությունում ցանկացել են, որ նա ստորագրի 1915 թվականի իրադարձությունները ցեղասպանություն ճանաչող հայտարարությունը: «Ինձ նաեւ ասեցին, որ կհեռացվեմ կուսակցությունից, եթե հրաժարվեմ: Ես պատասխանեցի, որ հարցի առնչությամբ պնդում եմ իմ կարծիքները: Ես չեմ հանձնվի: Ես պաշտպանում եմ խոսքի ազատությունը»:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
