ԵՄԱ նախագահի խոսքերով՝ լրատվամիջոցների ուշադրությունը երկխոսության հարցերին շատ դեպքերում պայմանավորված է դրամաշնորհային ծրագրերով:
Երեւանի մամուլի ակումբը, Արեւելյան գործընկերության քաղաքացիական հասարակության ֆորումի Հայաստանի ազգային պլատֆորմը հունիսի 3-ին ներկայացրեցին «Հայաստանում քաղաքացիական հասարակության մասնակցությունը քաղաքականության համաձայնեցման շուրջ երկխոսությանը» հետազոտության արդյունքները:
Երեւանի մամուլի ակումբի նախագահ Բորիս Նավասարդյանն ասաց, որ հետազոտության ընթացքում ուսումնասիրել են նաեւ լրատվամիջոցների աշխատանքը: Ընտրվել են հանրային նշանակություն ունեցող իրադարձությունները ակտիվ լուսաբանող 6 լրատվամիջոցներ՝ Հանրային, «Արմենիա», «Երկիր մեդիա» հեռուստաընկերությունները եւ Aravot.am, News.am եւ Lragir.am կայքերը:
«Մեր լրատվամիջոցները հանրային նշանակություն ունեցող հարցերին շատ քիչ ուշադրություն են դարձնում: Օրինակ՝ 2015 թվականի մարտին հանրային նշանակություն ունեցող հարցերին անդրադարձների կեսը ցեղասպանությանն էր վերաբերվում: Դա ինքնին բացասական երեւույթ չէ, բայց նշանակում է, որ այլ հարցերին քիչ ուշադրություն են դարձնում: Դա երեւի ոչ միայն 2015 թվականի մարտ-ապրիլ ամիսներին է, այլ ավանդական երեւույթ է մեր մամուլում»,- ասաց նա:
Կարդացեք նաև
Բորիս Նավասարդյանի խոսքերով՝ ուսումնասիրված լրատվամիջոցներից երկխոսության հետ կապված հարցերին Հանրային հեռուստաընկերությունն ամենաքիչ ուշադրություն է դարձրել. «Հեռուստատեսությամբ կարծես թե հակառակ պատկերը պետք է լիներ: Իսկ «Երկիր մեդիա» հեռուստաընկերությունը բոլորից շատ է ուշադրություն դարձրել երկխոսության հարցին: Եվրաինտեգրացիայի եւ եվրասիաինտեգրացիայի հարցերի անդրադարձների երեսուն տոկոսում մասնակցում էր քաղաքացիական հասարակությունը եւ խոսվում էր երկխոսության ռեժիմի մասին: Դա ամենաբարձր տոկոսն էր, երբ հանրային նշանակություն ունեցող տարբեր հարցերում քաղաքացիական հասարակության կարծիքն հաշվի է առվել»:
Նա նկատեց, որ լրատվամիջոցների ուշադրությունը երկխոսության հարցերին շատ դեպքերում պայմանավորված է դրամաշնորհային ծրագրերով. «Այսինքն՝ եթե կան դրամաշնորհներ, որոնք խրախուսում են լրատվամիջոցներում երկխոսության անդրադարձը, ապա այդ լրատվամիջոցում հարցը ուշադրության արժանանում է: Եթե չկա ծրագիր, ապա համապատասխան լրատվամիջոցում այդ հարցերը ավելի քիչ ուշադրության են արժանանում»:
Ամի ՉԻՉԱԿՅԱՆ
