ԱԺ տնտեսական հանձնաժողովի նիստում ՀԱԿ խմբակցության քարտուղար Արամ Մանուկյանն առաջարկում էր, որ գազի հանձնաժողովի բացահայտումներն ու Գազպրոմի չարաշահումների մասին փաստերն ուղարկեն դատախազություն: Սակայն, հանձնաժողովի նախագահ Վարդան Այվազյանը չէր համաձայնում՝ վստահեցնելով, որ դրանք ԱԺ կայքում կան, եթե դատախազությունն ուզենա գործ հարուցի, կվերցնի կայքից:
Այսօր լրագրողներն ԱԺ-ում գլխավոր դատախազ Գեւորգ Կոստանյանին հարցրեցին՝ ի՞նչն է խանգարում Ձեզ, որ կայքից վերցնեք այդ տեղեկությունները եւ գործ հարուցեք:
Կոստանյանը պատասխանեց. «Ոչ մի բան չի խանգարում»: Նա հիշեց նաեւ Լեւոն Զուրաբյանի գնահատականը, որ ԶԼՄ-ներում բազմաթիվ հայտարարություններ կան հանցագործությունների վերաբերյալ, որոնց դատախազությունն ընթացք չի տալիս:
Գեւորգ Կոստանյանի խոսքերով՝ «Քանի որ ԶԼՄ-ները իրենց հաղորդումների հիմքում կամ հայտարարությունների մեջ, դրանց հիմքում դնում են կոնկրետ ֆիզիկական անձանց տեղեկությունները, օրինակ, լրագրողը հայտնում է՝ ինչպես հաղորդեց Պողոս Պետրոսյանը…այսպես: Հետեւաբար այստեղ չի գործում Քրեական դատավարության 179-րդ հոդվածը: Որովհետեւ տեղեկություն տված անձը ֆիզիկական անձն է, ոչ թե լրատվամիջոցը: Երբ լրագրողը ԶԼՄ-ում որեւէ ռեալ հանցագործության մասին հաղորդում է անում՝ վկայակոչելով կոնկրետ ֆիզիկական անձին, այն ժամանակ նյութերի նախապատրաստման արդյունքում հրավիրվում է ֆիզիկական անձը: Այստեղ գործում է ֆիզիկական անձանց հաղորդումների քննարկման կարգը»:
Կարդացեք նաև
Լրագրողները մի քանի անգամ հարց ուղղեցին՝ Չայկայից ի՞նչ կա, Չայկայի նամակից ի՞նչ կա: Հարցը մի քանի անգամ կրկնելուց հետո Գեւորգ Կոստանյանը որոշեց չպատասխանել:
Կտրուկ փոխելով իր տրամադրվածությունը՝ հարցերին պատասխանելու, Կոստանյանն ասաց՝ լավ, ավարտեցինք ու արագ հեռացավ տարածքից՝ ճեղքելով օպերատորների տեսախցիկները: Լրագրողները փորձեցին պարզել՝ ո՞ր հարցին այդպես կաշկանդվեցիք, ի՞նչ պատահեց Ձեզ՝ Կոստանյանը ոչինչ չպատասխանեց՝ արագ մտնելով Հովհաննես Սահակյանի աշխատասենյակը:
Հռիփսիմե ՋԵԲԵՋՅԱՆ
