Այսօր Հայաստանի Գրողների միությունում Թուրքիայում ապրող հայերի խնդիրների վերաբերյալ քննարկման ընթացքում հրապարակախոս Մարի Բարսեղյան-Խանջյանը Թուրքիայի դեմ պայքարում եւ Հայոց ցեղասպանության ճանաչման գործում հաջողությունների հասնելու համար 3 քայլերից բաղկացած ծրագիր ներկայացրեց:
Նա առաջարկում է 3 կայք բացել. «Առաջինը պետք է լինի հայ ժողովրդի ծագման, մարդաբանական տեսակի, մշակույթի եւ այլնի մասին: Երկրորդ կայքը պետք է լինի սելջուկ-թուրքերի ծագման մասին. ովքեր են եղել, նրանց մարդաբանական տեսակը, նրանց ամբողջ պատմությունը, ինչ են արել, ինչ բարբարոսություն են արել»:
Երրորդ կայքը, ըստ Մարի Բարսեղյան-Խանջյանի, նախատեսված կլինի այն մարդկանց համար, որոնք գտել են իրենց արմատները եւ այդտեղ նրանք կգրեն իրենց պատմությունները: «Ես 7-8 նման պատմություն ունեմ գրած, որոնք շատ հուզիչ պատմություններ են: Եթե դրանց հիման վրա փոքրիկ սցենարներ գրվեն եւ ֆիլմեր նկարվեն աշխարհը կցնցեն դրանք եւ Թուրքիան ներսից կքանդվի»:
Հրապարակախոսն առաջարկում է այդ կայքերը ստեղծել Գերմանիայի եւ Թուրքիայի համար, որովհետեւ Գերմանիայում, 4 միլիոնից ավել Թուրքիայի քաղաքացի կա. «Ես այլեւս թուրք բառը չեմ գործածում, որովհետեւ այդ մարդիկ դժբախտություն են ունեցել վերջին 300-400 տարիների ընթացքում կորցնել իրենց ազգային պատկանելիությունը»:
Կարդացեք նաև
Իր այս դիտարկումը Մարի Բարսեղյան-Խանջյանը հիմնավորեց նրանով, որ երբ սելջուկ-թուրքերը սկսել էին ամբողջ աշխարհով արշավանքներ կատարել, պատերազմների ժամանակ, նրանք աստիճանաբար սկսեցին կոտորվել. «Բայց բանակը պետք է համալրվեր զինվորներով, որոնք չկային: Այսինքն` նրանք այդքան կին իրենց հետ չէին բերել, որ կարողանային երեխաներ ունենալ»:
Այդ պատճառով, ըստ հրապարակախոսի, թուրքերը սկսեցին քրիստոնյա երեխաների վերցնել եւ պահել: Բայց, քանի որ երեխաներին պետք է պահեին մինչեւ 8 տարեկան եւ նրանք հիվանդանում եւ մահանում էին, թուրքերը այլ քաղաքականություն սկսեցին. «Նրանք հարկային նոր քաղաքականություն որդեգրեցին: Այդ քաղաքականությունը բոլորին ծնկի բերեց: Մի մասը թողեցին հեռացան, մյուս մասն էլ Իսլամ ընդունեցին»:
Աշոտ ԻՍՐԱԵԼՅԱՆ
