«ՀՀԿ-ից եմ դժգոհում, ումից պետք է դժգոհեմ»,-Aravot.am-ի հետ զրույցում Բաղրամյան պողոտայում «Ոչ թալանին» նախաձեռնության կազմակերպած ընդդեմ էլեկտրաէներգիայի թանկացման նստացույցի ժամանակ 86-ամյա մասնակից Շիրին Հունանյանն իր բողոքն այսպես ներկայացրեց: Նա պատմեց, թե զրուցել է ոստիկանների հետ, հարցրել, թե ում է պետք այսքան տեխնիկան: Ըստ նրա՝ դա Սերժ Սարգսյանինն է. «Եթե նա մաքուր, արդար մարդ լիներ, մի անգամ կբարեհաճեր գար, ասեր, ժողովուրդ ջան, մենք կանենք ձեր ցանկացածը: Չի գալիս, քանի որ ժողովրդի թշնամին է, գնաց Ռուսաստան, պայմանավորվեց, ռուսներն ասացին, հանգիստ եղիր»: Շիրին Հունանյանը նշեց, թե իրեն մարտի 1-ին էլ են բերման ենթարկել. «Ռոբերտ Մելքոնյանն ասում էր, թե բիձա, արի քեզ շմոն անեմ»:
84-ամյա Գեղամ Պետրոսյանն իր ոգևորությունը հայտնեց երիտասարդների հանդեպ ու նշեց, թե հարգում ու պաշտում է նրանց: Այնուհետև պատմեց հունիսի 23-ի լուսադեմին տեղի ունեցածից որոշ ուշագրավ դրվագներ. «Նստած էի, մեր Սասունը մեջտեղում էր, քանի անգամ պտտվեց ջրցան մեքենան ազատամարտիկ Սասունի վրա, ես բարձրացա, ասացի, ջահելներ ջան, հեռացեք, ցուրտ է կսառեք, կհիվանդանաք, հետո ոստիկանները սկսեցին վազել, ես դրանց միջով անցնում ու հայհոյում էի, թե ինչ եք անում: Գնացի, հասա Օպերա, տեսնեմ երկու հոգու թևերից քաղաքացիական հագուստով բռնել են, մեկը ջրի մեջ լող է տալիս, լրիվ թրջված, չէր կարողանում բարձրանալ, քացով տվեցին աժդահաներ էին, տարան: Հյուսիսային պողոտայի աջ ու ձախ կողմերից մեկն էլ չէր հասցրել փախչել, հենց Օպերայի տարածքից տարան: Ինձ ձեռք չտվեցին, զարմանալի էր, ես հայհոյում էի նրանց, կարծում էի՝ ինձ էլ կտանեին, ծերությունս երևի հարգեցին»:
Կարդացեք նաև
Տաթև ՀԱՐՈՒԹՅՈՒՆՅԱՆ
