Ծանրամարտի Հայաստանի կանանց ազգային հավաքականը Աբովյան քաղաքում նախապատրաստվում է նոյեմբերին Հյուսթոնում կայանալիք աշխարհի առաջնությանը: Հավաքականի գլխավոր մարզիչ Արտաշես Ներսիսյանը Aravot.am-ի հետ զրույցում տեղեկացրեց, որ աշխարհի առաջնություն նախատեսում են գործուղել չորս մարզուհիների՝ Աննա Գովելյանին՝ 53 կգ քաշային կարգ, Նազիկ Ավդալյանին՝ 69, Մելինե Դալուզյանին՝ 75 եւ Հռիփսիմե Խուրշուդյանին՝ +75:
Aravot.am-ի հարցին, թե ողնաշարի վնասվածքից ու վիրահատությունից հետո մրցահարթակ վերադառնալը աշխարհի չեմպիոնի առողջությանը չի սպառնա, մարզիչը պատասխանեց. «Բնականաբար, Նազիկը ծանր վիրահատությունից հետո երկար ժամանակ բժիշկների հսկողությամբ վերականգնվել է եւ առանց նրանց, այդ թվում նաեւ՝ համաշխարհային ճանաչում ունեցող մասնագետների թույլտվության, մեծ սպորտ չէր վերադառնա: Այս տարվա հունվար-փետրվարից նա սկսել է թեթեւ մարզումները ու աստիճանաբար մեծացնում է ծանրաբեռնվածությունը: Փառք Աստծո, ամեն բան նորմալ է ընթանում: Հիմա նա բարձրացրած կիլոգրամներով մոտենում է իր լավագույն արդյունքների 85-90 տոկոսին: Աշխարհի առաջնությունը Նազիկի համար տեւական ընդմիջումից հետո մրցահարթակը վերզգալու եւ թիմին Ռիո դե Ժանեյրոյի օլիմպիական խաղերի վարկանիշային միավորներ բերելու նշանակություն ունի: Եթե ամեն բան հաջող ընթանա, կարծում եմ, եկող տարի Եվրոպայի առաջնությունում, որից հետո նաեւ՝ օլիմպիական խաղերում, նրա առջեւ արդեն հնարավոր կլինի կոնկրետ խնդիրներ դնել: Հիմա մեր ֆեդերացիան գործող կարգի պահանջների համաձայն աշխարհի առաջնությանը մասնակցելու իրավունք ստանալու համար Նազիկ Ավդալյանի փաստաթղթերն ուղարկել է մարզաձեւի միջազգային ֆեդերացիա եւ սպասում է թույլտվությանը: Կարծում եմ, դրան խանգարող հանգամանքներ չեն լինի»:
Աշոտ ՀԱԿՈԲՅԱՆ
Լուսանկարը՝ Նազիկ ԱՎԴԱԼՅԱՆԻ ֆեյսբուքյան էջից
