«Արձագանքները լավ են, թող լինեն, բայց դա չի նշանակում, որ ամեն մի արձագանքի, մենք ջղաձիգ պիտի հակադարձենք»,-Aravot.am-ի հարցին այսպես արձագանքեց ԱԺ տնտեսական հարցերի մշտական հանձնաժողովի փոխնախագահ, ԲՀԿ խմբակցության պատգամավոր Միքայել Մելքումյանն`անդրադառնալով «Որոտանի կասկադի» գործարքի առիթով վերջերս ռուսական կողմից նկատվող դժգոհություններին:
ՌԳԱ Արևելագիտության ինստիտուտի Կենտրոնական Ասիայի և Կովկասի ուսումնասիրման կենտրոնի փորձագետ Անդրեյ Արեշևը վերջերս ասուլիսում որպես բացասական հանգամանք է նշել «Որոտանի կասկադի» գործարքի կայացումը ամերիկյան ընկերության հետ: Նրա համոզմամբ` Ռուսաստանն այստեղ կարող էր մասնաբաժին ունենալ, քանի որ պատժամիջոցների պատճառով գուցե այստեղ ռուսական ընկերությունների հնարավորությունները սահմանափակվեն ամերիկյան ընկերության պատճառով: Այդ հնարավորությունը, նրա վստահեցմամբ, ռուսական կողմն արդեն բաց է թողել:
Միքայել Մելքումյանն այդ կարծիքին չէ: Ավելին, քանի որ Հայաստանի էներգետիկ համակարգը հիմնականում ներկայացված է ռուսական կապիտալով` «Սեւան-Հրազդան կասկադը», հինգերորդ էներգաբլոկը, Հրազդան ՋԷԿ-ը եւ այլն, այս իմաստով «Որոտանի կասկադի» գործարքը հակակշռում կամ հավասարակշռում է այդ հարաբերությունները: Նա նաեւ ընդգծում է, որ ամեն դեպքում հարաբերությունների կարգավորումը պատկանում է Հայաստանի Հանրապետությանը. «Մեզ մոտ գործում է, էներգետիկայի մասին, հանրային ծառայությունների մասին օրենք, կարգավորիչ մարմին է հանդիսանում հանձնաժողովը, բոլոր ներդրումային ծրագրերն էլ, կլինի դա ամերիկյան կապիտալ, ռուսական, թե ուրիշ, կարգավորվելու է մեր սահմանած խաղի կանոններով: Որոտանի գործարքը կարող էր չլինել, բայց եթե եղել է` ոչ ռուսական կապիտալի առկայությունը միայն դրական է: Մենք մենաշնորհային ցիկլից պետք է դուրս գանք, քանի որ բաշխիչ ցանցերն էլ են ռուսական»:
ԲՀԿ-ական պատգամավորը նաեւ նկատում է, որ բիզնեսը ստատիկ չէ եւ կախված շահերից, միեւնույն օբյեկտը մի քանի անգամ կարելի է վերավաճառել, ետ գնել , այլ գործընկերներ ներգրավել, եւ այլն:
Կարդացեք նաև
Նելլի ԳՐԻԳՈՐՅԱՆ
Մեր երկրում հայկակական կապիտալ չպետք է լինի: Եվ իշխանականները, և ընդիմադիրները այս հարցում միակարծիք են: Շահութաբեր կազմակերպությունները պետք է օտարեն ու հետո ասեն, որ բոլոր ռազմավարական օբյեկտները օտարվել են: Ամոթ է…