«Քիմիայի՝ որպես գիտության նկատմամբ հետաքրքրությունը ոչ թե ամբողջ աշխարհում է նվազել, այլ Հայաստանում: Այսինքն՝ այնտեղ, որտեղ դեռ հնարավորություններ չկան դրա հետագա զարգացման համար»,- ասում է Ընդհանուր և անօրգանական քիմիայի ինստիտուտի տնօրեն Նիկոլայ Կնյազյանը՝ ընդգծելով, որ դե´ռ չկա. «Ես լավատես եմ և չեմ կարծում, որ դա այդպես էլ կմնա: Մի օր լույսը կբացվի նաև քիմիայի առաջ, և կգա ժամանակ, որ քիմիան նորից իր թևերը կփռի Հայաստանի վրա: Մենք կունենանք հզոր քիմիա ու քիմիական արդյունաբերություն, ինչպես տարիներ առաջ էր, երբ Հայաստանի քիմիկոսներն ու քիմիական արդյունաբերությունն առաջիններից էին Խորհրդային Միությունում»:
Նիկոլայ Կնյազյանը վստահեցնում է, որ, ընդհանուր առմամբ, այդ ներուժը, հնարավորությունը կա. «Այսինքն՝ մենք կարող ենք մեր նախկին ֆունդամենտի վրա շարունակել վերնաշենքը: Այստեղ խնդիր է, թե ինչպես պետք է հայ երիտասարդներին ներգրավենք մեր ընդհանուր գիտական աշխատանքներում: Ինչ խոսք, երիտասարդների հոսքը հիմա փոքրացել է, բայց չի վերացել, և կարևորն այդ կապը չկտրելն է»,- ասում է Ընդհանուր և անօրգանական քիմիայի ինստիտուտի տնօրենը:
Քիմիայի նկատմամբ չմարած հետաքրքրության ապացույցներից մեկն էլ, ըստ Ն. Կնյազյանի, ՀՀ գիտությունների ազգային ակադեմիայում այսօր մեկնարկած «Քիմիա և քիմիական տեխնոլոգիաներ» 4-րդ միջազգային գիտաժողովի անցկացումն է:
Գիտաժողովին մասնակցում են շուրջ 150 գիտնականներ Ռուսաստանից, Բելառուսից, Ուկրաինայից, Վրաստանից, Ղազախստանից և այլ երկրներից:
Կարդացեք նաև
‘IV International Conference on Chemistry and Chemical Technology’ took place at the RA NAS
Ն. Կնյազյանի փոխանցմամբ՝ գիտաժողովի մասնակիցները ներկայացնելու են քիմիայի և քիմիական տոխնոլոգիաների զարգացման նոր ուղղություններ անօրգանական նյութերի սինթեզի, ոչ մետաղական հումքի, մետաղական հանքատեսակների և արտադրական թափոնների համալիր վերամշակման տեխնոլոգիաների բնագավառներում: Նրանք կանդրադառնան նաև նանոկոմպոզիտային, գերկարծր, հատուկ մաքրության, ապակեկերպ, ապակեբյուրեղային, կոմպլեքսային միացությունների, ինչպես նաև քիմիական արտադրությունների և շրջապատող միջավայրի էկոլոգիական խնդիրներին:
«Այս գիտաժողովը հնարավորություն է տալիս գտնելու ժամանակակից այն ուղղությունները, որոնք անհրաժեշտ են քիմիայի և քիմիական տոխնոլոգիաների զարգացման համար: Ես հույս ունեմ նաև, որ գիտաժողովն այլ ինստիտուտների հետ նոր համագործակցությունների ուղի կբացի»,- ասաց Ն. Կնյազյանը:
Հավելենք, որ գիտաժողովն իր աշխատանքը կշարունակի մինչև սեպտեմբերի 18-ը: Այդ ընթացքում կկայանա նաև երիտասարդ գիտնականների հանդիպումը Արցախի գիտական կենտրոնի երիտասարդ գիտնականների հետ:
Սիրանուշ ՀԱՅՐԱՊԵՏՅԱՆ
