«Ինտեր ՌԱՕ»-ն արդեն հոկտեմբերի վերջում կարող է «Հայաստանի էլեկտրական ցանցեր» ՓԲԸ-ն վաճառել: «Коммерсант»-ի տեղեկություններով՝ ՀԷՑ-ը գնելու առաջարկ է արել «Marcuard Heritage» ընկերությունը, որի հիմնադիրները սերտ կապեր ունեն Ռուսաստանի հետ:
Այդ կազմակերպության գլխավոր տնօրեն եւ համասեփականատեր Սինան Բոդմերը Սամվել Կարապետյանի «Տաշիր» ընկերությունների խմբի մեջ գտնվող «Ֆորա Բանկի» տնօրենների խորհրդի անդամ է: Կազմակերպության մյուս համասեփականատեր Հանս-Յորք Ռուդլոֆը 7 տարի եղել է «Ռոսնեֆտի» տնօրենների խորհրդում: Հենց Սամվել Կարապետյանն էր հունիսին «Коммерсант»-ի տվյալներով համարվում ՀԷՑ-ի ամենահավանական գնորդներից մեկը:
Հիշեցնենք, որ կառավարության երեկվա նիստից հետո պարզ դարձավ, որ «Ինտեր ՌԱՕ» ռուսական ընկերությունը պատրաստվում է վաճառել «Լիորմանդ Հոլդինգ Լիմիթեդ» ընկերությանը: Կառավարությունը հավանություն է տվել այդ առաջարկին: Հայտնի է դարձել, որ ՀԷՑ գնել պատրաստվող ընկերությունը օֆշորային գոտում է գրանցված:
«Коммерсант»-ը ուսումնասիրել է կիպրական ռեեստրները եւ պարզել է, որ Կիպրոսում գրանցված «Լիորմանդ Հոլդինգ Լիմիթեդ»-ի սեփականատեր ընկերությունների շղթան տանում է մինչև Marcuard Heritage, որը ակտիվների կառավարման ընկերություն է:
Կարդացեք նաև
Նշենք նաեւ, որ «Տաշիր» ընկերությունների խմբի մամուլի քարտուղար Զառա Աճեմյանը «Մեդիամաքս»-ի հետ զրույցում չի հաստատել, որ «Տաշիրը» հանդիսանում է «Լիորմանդ Հոլդինգ Լիմիթեդ» ընկերության հիմնադիրը:
Պատրաստեց Աշոտ ԻՍՐԱԵԼՅԱՆԸ
