Էներգետիկայի և բնական պաշարների նախարար Երվանդ Զախարյանն այսօր կառավարության նիստից հետո անդրադարձավ ՀԷՑ-ի վաճառքի վերաբերյալ հարցին՝ նշելով, որ առաջարկություն է եղել Ինտեր ՌԱՕ –ի կողմից իր բաժնետոմսերի վաճառքի հետ կապված, կառավարությունն էլ այսօր այդ առաջարկին հավանություն տվեց, և եղավ նախնական համաձայնություն՝ ուսումնասիրել բոլոր փաստաթղթերը, առուվաճառքի պայմանագիրը:
Հարցին, թե ՀԷՑ-ը գնելու հայտ ներկայացրած ընկերությունը օֆշորային գոտում է գրանցված, Զախարյանը պատասխանեց, որ բոլոր փաստաթղթերը կուսումնասիրվեն: Իսկ թե ով է ընկերության սեփականատերը, պատասխանեց. «Չեմ կարող պատասխանել, մանրամասներ առայժմ չեմ կարող հայտնել, մեկ-երկու օրից, երբ ուսումնասիրությունները կավարտենք, մանրամասն բոլոր հարցերին կպատասխանենք»:
Վաճառքի գնի մասին հարցին, նույնպես, նրա խոսքով, ուսումնասիրություններից հետո կանդրադառնան:
Կարդացեք նաև
ՀԷՑ-ի կուտակած պարտքերին անդրադառնալով՝ նախարարն ասաց, որ այդ պարտավորությունները կփոխանցվեն նոր ընկերությանը:
Ըստ Զախարյանի՝ նախարարությունների կողմից ՀԷՑ-ի վաճառքի հայտը ուսումնասիրելու գործընթացը տևելու է մեկ շաբաթ, որից հետո կներկայացվեն ՀԷՑ-ի վաճառքի վերաբերյալ մանրամասներ ու վերջնական որոշում կկայացվի: Այսօր ընդամենը հավանություն է տրվել բաժնետոմսերն օտարելու առաջարկին:
Նա նաև ասաց, որ վաճառքի հետևանքով էլեկտրաէներգիայի սակագնի վերանայում չի լինի: «Սակագինն արդեն հաստատված է հանձնաժողովի կողմից: Սակագինը չի վերանայվի, սակագինը ո՞նց կարող է վերանայվել, եթե նոր սակագները արդեն գործում են»:
Նելլի ԲԱԲԱՅԱՆ
