Մեծանուն կոմպոզիտոր Ալեքսանդր Սպենդիարյանի տուն-թանգարանում այսուհետեւ կցուցադրվեն աշխարհահռչակ միկրոքանդակագործ Էդուարդ Տեր-Ղազարյանի թոռան՝ Էդուարդ Տեր-Ղազարյանի՝ սպենդիարյանական թեմաներով միկրոքանդակները: Արվեստի այդ գլուխգործոցները տեսնելու համար մանրադիտակ է անհրաժեշտ: «Ջութակ ասեղի անցքում» միկրոքանդակը պատրաստված է փայտի 16 կտորից, բարձրությունը 0.8 մմ է, իսկ «Ալեքսանդր Սպենդիարյանը՝ դիրիժոր» գործը նկարվել է յուղաներկով՝ մազի սրած ծայրով՝ օնիքսի բեկորի վրա:
Ներկայացնելով աշխատանքները` Էդուարդ Տեր-Ղազարյանը նշեց, որ 2009 թվականից շարունակել է հանճարեղ պապի գործը՝ կերտելով անհավանական միկրոքանդակներ եւ պահպանելով արվեստի այդ յուրօրինակ ճյուղը: «Աշխարհում հաշված թվով մարդիկ են զբաղվում միկրոքանդակագործությամբ: Թե որքանով կհաջողվի հավասարվել պապիս, չեմ կարող ասել, բայց բավականին մեծ ջանքեր եմ գործադրում: Պապս 70 տարվա գիտելիքները փոխանցել է ինձ: Որոշ բաներ նաեւ գրի եմ առել եւ հետագայում իրագործել: Եթե գիտես նյութաբանությունը, կարողանում ես որոշ գործել կատարելագործել եւ ավելի փոքրացնել»,-նշեց Էդուարդ Տեր-Ղազարյանը:
Կարդացեք նաև
Նա ստեղծել է 70-ից ավելի միկրոքանդակ, որոնցից ավելի քան քառասունը՝ հիմնականում՝ լոգոտիպեր, նվիրել է տարբեր ընկերությունների եւ կազմակերպությունների:
Հավելենք, որ հեղինակի պապի՝ արվեստի վաստակավոր գործիչ, մանրաքանդակի անզուգական վարպետ Էդուարդ Ղազարյանի եզակի աշխատանքները զարմացրել են ամբողջ աշխարհին: Նրա նշանակալի ձեռքբերումը միկրոքանդակագործության նոր ուղղության` շարժական միկրոաշխատանքների ստեղծումն էր:
Ի դեպ, մեծանուն վարպետը ստեղծել է աշխարհում առաջին երաժշտական ավտոմատ-զենքը, որը ոչ թե սպանում է, այլ մեծ հաճույք պատճառում երաժշտասերներին:
Էդուարդ Տեր-Ղազարյանը մահացել է 2012թ.-ին:
Լուիզա ՍՈՒՔԻԱՍՅԱՆ
