Ռուսաստանի ժողովուրդների ժողովի խորհրդի կոմիտեի հասարակական դիվանագիտության հանձնաժողովի ղեկավար Արկադի Թումասովը հայտարարել է, որ «ՆԱՌ» հայ համայնքի զարգացման միջազգային կենտրոնը պատրաստ է աջակցել «Իսլամական պետություն» ահաբեկչական խմբավորման դեմ պայքարին: Այս տեղեկությունը հաղորդել է «News-front»-ը:
«Եկել է ժամանակը համախմբելու Հայկական Սփյուռքը: Ամենակարեւորը ԱՄՆ-ի եւ Եվրոպայի հզոր Սփյուռքի միջոցով ճնշում գործադրելն է այդ երկրների ղեկավարության վրա, որպեսզի աջակցեն Ռուսաստանի խաղաղապահ գործունեությանը եւ դադարեցնեն ահաբեկիչների ֆինանսավորումը եւ տարածաշրջանի իրավիճակի ապակայունացումը»,- նշել է նա:
Արկադի Թումասովը ասել է նաեւ, որ ցանկացած հայ, անկախ նրա բնակության վայրից, պետք է հասկանա, որ ԻՊ-ի զարգացումը ուղղակի վտանգ է ներկայացնում ոչ միայն սիրիահայերի, այլեւ՝ Հայաստանի եւ ամբողջ աշխարհի համար:
Թումասովը նաեւ ընդգծել է, որ այսօր Ռուսաստանը միակ ուժն է, որ կարող է կանխարգելել տվյալ վտանգը. «Ռուսաստանի հայերը պատրաստ են ամբողջական աջակցություն ցուցաբերել «ՆԱՌ» կազմակերպությանն այդպիսի կարեւոր գործում»:
Կարդացեք նաև
«News-front»-ի մեկ այլ տեղեկատվության համաձայն՝ «Քաղաքացիական միություն» միջազգային կազմակերպության ղեկավար Արմեն Մարտիրոսյանն էլ հայտարարել է, որ «ՆԱՌ»-ը արժանի է համամարդկային հարգանքի որպես հայերի միջազգային հասարակական միավորում, որը չի վախեցել ուղիղ եւ բաց մարտահրավեր նետել ծայրահեղականներին:
Պատրաստեց Աշոտ ԻՍՐԱԵԼՅԱՆԸ
