Գերմանիայի կանցլեր Անգելա Մերկելը՝ Թուրքիայի կատարած այցի ընթացքում այդ երկրի վարչապետ Ահեդ Դավութօղլուի հետ քննարկել է Հայոց ցեղասպանության հարցը: Գերմանիայի կառավարության պաշտոնական կայքից տեղեկանում ենք, որ այս մասին հայտնի է դարձել հանդիպումից հետո տեղի ունեցած մամուլի ասուլիսի ընթացքում:
Ահմեդ Դավութօղլուն, մասնավորապես, ասել է. «Մենք նաեւ խոսեցինք 1915 թվականի եւ այդ կապակցությամբ Բունթեսթագում առկա դիմումին վերաբերող որոշ հարցերի մասին: Ես ասացի, որ այդ հարցերն իրականում պետք է հատուկ քննարկվեն ակադեմիական ձեւաչափով հանձնաժողովի շրջանակում, որի կազմում ընդգրկված կլինի նաեւ գերմանացի փաստաբան»:
Նա նաեւ եւս մեկ անգամ այս հարցի շուրջ ներկայացրել է Թուրքիայի դիրքորոշումը. «Երկու երկրներն էլ Առաջին համաշխարհային պատերազմի տարիներին նույն կողմում են եղել եւ նրանք պետք է պատմաբանների հանձնաժողովում մյուս պատմաբանների հետ համատեղ հավաքվեն, որպեսզի քննարկեն այս հարցը: Մենք պատրաստ ենք այս առումով ցանկացած աջակցություն ցուցաբերել»:
Դավութօղլուն նշել է, որ իրենք ցանկանում են սրանով նաեւ պատմական հաշտեցում հասնել Թուրքիայի եւ հայերի միջեւ եւ պատրաստ են ցանկացած համագործակցության:
Կարդացեք նաև
Գերմանիայի կանցլեր Անգելա Մերկելն էլ իր հերթին ասել է, որ կցանկանար սրտանց շնորհակալություն հայտնել քննարկումների եւ Թուրքիայի ու Հայաստանի հարցը եւս մեկ անգամ պատմաբանների հետ քննարկելու առաջարկության համար. «Ես կարծում եմ, որ մենք կարող ենք և ինտենսիվ կշարունակենք մեր աշխատանքը»:
Պատրաստեց Աշոտ ԻՍՐԱԵԼՅԱՆԸ
