Միացյալ Նահանգների Ներկայացուցիչների պալատի նոր նախագահ դարձած 45-ամյա հանրապետական Փոլ Ռայանը վերջին 150 տարիների ընթացքում ԱՄՆ-ի երրորդ ամենակարեւոր պաշտոնը զբաղեցնող ամենաերիտասարդ քաղաքական գործիչն է: Ռայանն այդ պաշտոնը հրաժարվում էր զբաղեցնել, որպես նախապայման պահանջելով սեփական կուսակիցներից միասնություն ցուցաբերել: Այս անգամ եւս, երդման արարողությանը հետեւած իր ելույթը նորընտիր խոսնակը սկսեց հավատքի եւ միասնության կոչով.
«Մեր ուսերին ծանր բեռ է, այնպես որ, եթե աղոթում եք, եկեք աղոթենք միմյանց համար, հանրապետականները թող աղոթեն դեմոկրատների, իսկ դեմոկրատները՝ հանրապետականների համար»:
Փոլ Ռայանի խոսքով, Միացյալ Նահանգներին անհրաժեշտ է արմատական բարեփոխումներ կատարել՝ ամերիկացիների կյանքի բարելավման ուղղությամբ.
«Էլ ոչ մի արտոնություն ընտրյալների համար, այսուհետ՝ հնարավորություններ բոլորի համար»:
Կարդացեք նաև
Փոլ Ռայանի ընտրությունը խոսնակի պաշտոնում ողջունել են Միացյալ Նահանգների հայկական կազմակերպությունները, որոնց ներկայացուցիչների խոսքով, կոնգրեսական ընտրվելուց ի վեր Ռայանն աջակցել է հայ-ամերիկյան բարեկամության ամրապնդմանը:
«Տարեց տարի նա աջակցություն է ցուցաբերել Հայոց ցեղասպանության ճանաչմանն ուղղված օրինագծերի», – ասում է Ամերիկայի Հայկական Համագումարի գործադիր տնօրեն Բրայան Արդունին:
Նյութի մանրամասները կարդացեք «Ամերիկայի Ձայն»-ի կայքում
