«Ես կարծում եմ՝ քարոզարշավը եղել է փայլուն, աննախադեպ»,- դեկտեմբերի 2-ին «Հենարան» մամուլի ակումբում լրագրողների հետ հանդիպման ընթացքում այսպես բնութագրեց քարոզարշավը ԱԺ պատգամավոր, ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը:
Սակայն, նա հայտարարեց, որ հեռու է այն տեսակետից, որ բոլոր քաղաքացիները տեղեկացված են. «Կարելի՞ է ասել, որ մեր քաղաքացիների մեծ մասը տեղեկացված է, ցավոք՝ ոչ: Սակայն դա միայն Հայաստանի իրողությունը չէ: Ես ասել եմ ու էլի եմ ուզում կրկնել՝ դա իրողություն է բոլոր այն երկրներում, որտեղ սահմանադրական փոփոխություններ են իրականացնում»:
Անդրադառնալով «Ոչ»-ի ճակատի հայտարարություններին, թե իշխանությունը տապալել է այո-ի քարոզարշավը՝ Գագիկ Մինասյանն ասաց. «Մեր նպատակը առաջինը, եւ կարծում եմ՝ բոլորի նպատակը այն է, որ պետք է Սահմանադրությունը ճիշտ ներկայացվի, այսինքն՝ տեղեկացվածության մակարդակը պետք է բարձր լինի, որպեսզի մեր քաղաքացին կարողանա ինքնուրույն որոշում կայացնել, դա է գերխնդիրը: Օրինակ՝ մեր այսօրվա հանդիպման գերխնդիրը դա է՝ ես ուզում եմ ձեզ տեղեկացնել, որ այսպիսի հնարավորություն կա նոր Սահմանադրության մեջ, որը բացառվում է գործող Սահմանադրության մեջ: Մեր քաղաքացին պետք է տեղեկացված լինի, որպեսզի իր որոշումը գիտակցված կայացնի»:
Ամի ՉԻՉԱԿՅԱՆ
