Ճարտարապետների միության նախագահ Մկրտիչ Մինասյանն այսօր «Անդրադարձ» մամուլի ակումբում խոսեց նաեւ երեւանյան շենքերի սեյսմակայունության խնդրից: Նա ասաց, որ բնակիչները շատ են ահազանգում շենքերի վերին հարկերի կառուցման մասին. «Գնում են վերջին հարկը, ավելացնում եւս մեկ հարկ: Երբեմն երկու հարկ են կառուցում: Այդ օրինակները շատ են Երեւանում եւ վտանգում են ամբողջ շենքը: Երկաթբետոնից կառուցված ձեղնահարկերը վտանգավոր են: Եթե մեկը ձեռք է բերում վերջին հարկը եւ մտածում, թե ինչ կուզի՝ կանի, բնակիչները չպետք է թույլ տան: Հարկը ավելացնողներին չի մտահոգում, որ ամբողջ շենքն իրենց պատճառով կարող է քանդվել»:
Մինասյանը նկատեց, որ թամանյանական շենքերի մեծամասնությունը վտանգված է. «Դրանք կառուցված են յոթ բալանոց հիմքով: Շենքը պետք է միշտ կապիտալ հիմնանորոգել»:
Ճարտարապետ Սաշուր Քալաշյանն էլ նշեց, որ Սովետական շրջանում կառուցված շենքերը սեյսմակայուն չեն. «Որոշակի միջոցներ կարծես թե մասնագետները կարողացել են գտնել՝ բարձրահարկ՝ 9 հարկանի շենքերի համար: Խոսքը ռետինե բարձիկների վրա հիմնված կոնստրուկցիաների մասին է: Շենքի վրա այդպիսի տեխնոլոգիայով կառուցվում է մեկ հարկ, որը բարձրացնում է շենքի սեյսմակայունությունը: Այդ հարկը ռետինե բարձիկների վրա է կառուցվում եւ «մարում» տատանումները: Այդ ամենն արվում է առանց բնակիչներին շենքից դուրս հանելու»:
Ճարտարապետը տեղեկացրեց, որ Կառավարությունը հավանություն է տվել այդ մեթոդը կիրառելու առաջարկին, սակայն առայժմ տեխնոլոգիան դժվարությամբ է օգտագործվում. «Այդպիսի կոնստրուկցիայով հարկեր արդեն կառուցվել են Երեւանում եւ Վանաձորում: Պետական միջոցներ պետք չեն: Դա բիզնես պլան է, եթե որեւէ ներդնող ուզում է հարկ կառուցել առանց հողի հատկացման, կարող է ստանալ բնակիչների թույլտվությունը եւ կառուցել»:
Կարդացեք նաև
Լուիզա ՍՈՒՔԻԱՍՅԱՆ
