Արդեն ուժի մեջ է մտել նոր Սահմանադրության Մարդու իրավունքներին վերաբերող համապատասխան գլուխը, որի համաձայն՝ ՄԻՊ թեկնածու է ներկայացնելու ոչ թե Ազգային ժողովը, այլ՝ ԱԺ համապատասխան հանձնաժողովը:
Խորհրդարանում ընթացած «ծպտյալ» բանավեճից հետո որոշվեց, որ մարդու իրավունքների պաշտպանի հաջորդ թեկնածուին առաջադրելու է ԱԺ պետաիրավական հարցրով մշտական հանձնաժողովը:
Որոշ պատգամավորներ կարծում են, որ մարդու իրավունքների հանձնաժողովը պետք է ներկայացնի թեկնածու: Եվ քանի որ ՄԻՊ-ը հրաժարական է տվել՝ հանձնաժողովը մինչև ԱԺ քառօրյա նիստը պետք է ներկայացնի օմբուդսմենի նոր թեկնածու: Ըստ նոր կարգի՝ թեկնածու է ներկայացնելու հանձնաժողովի անդամների 1/3-րդը:
Հանձնաժողովի ընդդիմադիր պատգամավորներն առարկեցին թեկնածուի ներկայացման համամասնության վերաբերյալ: Պատճառաբանությունը հետեւյալն է` քանի որ հանձնաժողովում մեծամասնություն է կազմում իշխող Հանրապետական խմբակցությունը, ստացվում է, որ ՄԻՊ թեկնածուի ներկայացման հարցը ՀՀԿ-ի մենաշնորհն է:
Կարդացեք նաև
«Հանձաժողովում բացի գործող մեծամասնությունից՝ այլ խմբակցություններ չունեն մեկ երրորդով պատգամավորների ներկայացվածություն, դրա համար կամ պետք է 1/3-րդի համամասնությունը փոքրացվի, կամ ամեն մի պատգամավորի հնարավորություն տրվի ներկայացնելու իր թեկնածուն: Հակառակ դեպքում կստացվի, որ միայն ՀՀԿ-ն է ներկայացնելու թեկնածու»,- ասաց ԱԺ անկախ պատգամավոր Էդմոն Մարուքյանը:
Նրա հետ համաձայն էր նաեւ «Ժառանգություն» խմբակցության պատգամավոր Զարուհի Փոստանջյանը:
Պետաիրավական հարցերի հանձնաժողովի նախագահ Հովհաննես Սահակյանն էլ համաձայնեց ընդդիմադիրների դիտարկումներին: Հարցը կքննարկվի, հավանական է, կվերանայվի. «Իսկապես, քննարկման առարկա կդարձնենք, մեր մոտեցումը դրական է ու մեկ երրորդի հարցը գուցե վերանայվի: 1/3-րդը պետք է նվազեցվի կամ իրավասությունը վերապահենք բոլոր պատգամավորներին, որ բոլոր անդամները ներկայացնեն թեկնածու: Հավանաբար, շեմը կիջեցնենք 1/5-րդի: Հարցը քննարկելի է»:
Նելլի ԳՐԻԳՈՐՅԱՆ
