«Դասերը հետաձգելու մասին որոշումը շատ ճիշտ էր. կարողացանք շրջանցել հիվանդությունը: Հակառակ դեպքում կունենայինք դասեր, բայց մեծ թվով բացականեր: Այսինքն՝ կօգնեինք համաճարակին»,-այսօր «Հենարան» մամուլի ակումբում խոսելով Կրթության եւ գիտության նախարարության՝ դասերը հետաձգելու որոշման մասին, ասաց ԱԺ պատգամավոր, «Դպրոց-կենտրոնների միության» նախագահ Ռուզաննա Մուրադյանը: Նրա խոսքով՝ բաց թողած դասերը հնարավոր է լրացնել՝ կազմակերպված աշխատանքի շնորհիվ. «Լավագույն ուսուցիչները պետք է կարողանան չափորոշիչային պահանջն ապահովել ճիշտ մեթոդիկա օգտագործելով: Նպատակը ժամը լրացնելը չէ, այլ այն, որ իրականացվի առարկայի չափորոշիչային պահանջը: Ուսուցիչները պետք է մի քիչ ավելի ստեղծագործ մոտեցում ցուցաբերեն, եւ վստահ եմ, որ աշակերտները թեմատիկ բացթողումներ չեն ունենա»:
Ռուզաննա Մուրադյանն առաջարկում է իրականացնել ուսուցիչների շարունակական վերապատրաստման ծրագիր. «Այսօր շատ երկրներում ուսուցչին միայն առարկայի չափորոշիչն է տրվում՝ առանց ժամերի, դասագրքի, եւ ուսուցիչը կազմում է իր ծրագիրը, ժամաքանակը, որպեսզի վերջում տա այն արդյունքը, որը ամրագրված է ըստ չափորոշիչի: Եթե կարողանանք ուսուցչին ավելի շատ զինել եւ բաց թողնված ժամերի հետեւից չգնալ, կունենանք շոշափելի արդյունք»:
Բանախոսի համոզմամբ՝ անհրաժեշտ է նաեւ ուսուցիչների եւ աշակերտների համար առցանց դասընթացներ եւ սեմինարներ կազմակերպել. «Ֆեյսբուքում բավականին մեծ թվով ուսուցիչներ ակտիվ են եւ շփվում են աշակերտների հետ: Կարելի է օգտագործել այդ հարթակը՝ գիտելիքները լրացնելու համար»:
Կարդացեք նաև
Լուիզա ՍՈՒՔԻԱՍՅԱՆ