Փետրվարի 9-ին Լյուբլյանայում Հայաստանի և Սլովենիայի արտաքին գերատեսչությունների միջև անցկացվեցին քաղաքական խորհրդակցություններ: Հայկական պատվիրակությունը ղեկավարում էր Հայաստանի արտաքին գործերի նախարարի տեղակալ Կարեն Նազարյանը, իսկ սլովենականը՝ ԱԳՆ քաղաքական հարցերով գլխավոր տնօրեն Թոմաժ Լովրենչիչը: Հայկական պատվիրակության կազմում էր Սլովենիայում ՀՀ դեսպան (նստավայրը Հռոմ) Սարգիս Ղազարյանը:
Կողմերը քննարկեցին հայ-սլովենական հարաբերություններին առնչվող հարցերի լայն շրջանակ, այդ թվում՝ երկկողմ քաղաքական ու տնտեսական հարաբերությունների խթանման ու տարբեր ոլորտներում փոխշահավետ համագործակցության զարգացման հեռանկարները: ՀՀ ԱԳ նախարարի տեղակալը ներկայացրեց Հայաստան – Եվրոպական միություն հարաբերություններում արձանագրված առաջընթացը: Անդրադարձ կատարվեց միջկառավարական կառույցներում և խորհրդարանական վեհաժողովների շրջանակներում երկու երկրների փոխգործակցությանը, մտքեր փոխանակեցին տարածաշրջանային զարգացումների շուրջ:
Սլովենիայի ԱԳՆ պետքարտուղար Դրագոլյուբա Բենչինայի հետ աշխատանքային ճաշի ընթացքում երկուստեք պատրաստակամություն հայտնվեց ամենայն աջակցություն ցուցաբերել երկկողմ հարաբերությունների զարգացմանն ու ամրապնդմանն ուղղված քայլերին ու նախաձեռնություններին, ինչպես նաև ՄԱԿ-ում ու միջազգային այլ կազմակերպություններում երկու երկրների միջև համագործակցությանը:
ԱԳ նախարարի տեղակալի ղեկավարած պատվիրակությունը հանդիպում ունեցավ նաև Սլովենիայի պետքարտուղար Յանեշ Լենարչիչի հետ: Հանդիպմանը քննարկվեցին երկկողմ հարաբերությունների զարգացմանն առնչող հարցեր: Հատուկ անդրադարձ կատարվեց տարածաշրջանային անվտանգության և կայունության հետ կապված խնդիրներին, ինչպես նաև Լեռնային Ղարաբաղի հակամարտության խաղաղ կարգավորմանն ուղղված Հայաստանի մոտեցումներին ու ջանքերին:
Լյուբլյանը այցի ընթացքում ԱԳ նախարարի տեղակալը հանդիպեց նաև Սլովանիայի Ազգային խորհրդի նախագահ Միտյա Բարվարի հետ:
ՀՀ ԱԳՆ
