Կենտրոն եւ Նորք Մարաշ ընդհանուր իրավասության դատարանը երկու ամսով երկարացրել է ՀՀ պաշտպանության նախարարի նախկին տեղակալ Վահան Շիրխանյանի նկատմամբ կիրառված խափանման միջոցի՝ կալանքի ժամկետը:
Հիշեցնենք, որ Պաշտպանության փոխնախարարը ձերբակալվել էր Նորք Մարաշում հայտնաբերված զինված խմբավորման գործի շրջանակներում:
Վահան Շիրխանյանի պաշտպանը՝ փաստաբան Ստեփան Ոսկանյանը Aravot.am-ին տեղեկացրեց, որ իրենց ներկայացրած միջնորդությունը, նախկին փոխնախարարին գրավի դիմաց ազատ արձակելու մասին, մերժվել է. «Նույն պատճառաբանությամբ է մերժվել, որ ազատության մեջ մնալով խոչընդոտելու է քննությանը եւ թաքնվելու է քննությունից»:
Փաստաբանը նշեց, որ իրենք դատական նիստը հետաձգել էին, որպեսզի առողջական վիճակի մասին փաստաթղթեր ձեռք բերեին եւ ներկայացնեին. «Ես այդ փաստաթուղթը ձեռք բերեցի եւ ներկայացրեցի դատարանին, սակայն դատարանը դրան որեւէ գնահատական չտվեց: Առողջական վիճակը, տարիքը, ոչինչ հաշվի չառավ դատարանը»:
Կարդացեք նաև
Ստեփան Ոսկանյանը նշեց, որ բողոքարկելու են դատարանի որոշումը եւ կրկին պահանջեն անհապաղ տեղափոխել մասնագիտացված բուժհաստատություն. «Այժմ Վահան Շիրխանյանի վիճակը նորից նույն վատ վիճակում է: Այդ պատճառով էլ չկարողացավ դատական նիստին մասնակցել, դժվարանում է քայլել»:
Աշոտ ԻՍՐԱԵԼՅԱՆ
Լուսանկարը եւ տեսանյութը՝ Գագիկ ՇԱՄՇՅԱՆԻ/shamshyan.com
