«Մենք օբսիդիանի մշակման պետտուրքը 100 անգամ նվազեցնում ենք: Ձեր գնահատականով՝ 6 տարի մի պետտուրք ունենալ, որը խեղդում էր արդյունաբերությունը, նշանակում է չունենալ պետության քաղաքականություն»,- այսօր ԱԺ-ում «Պետտուրքի մասին» օրենքում լրացումներ կատարելու մասին կառավարության ներկայացրած նախագծի քննարկման ժամանակ ասաց ՀԱԿ խմբակցության ղեկավար Լեւոն Զուրաբյանը:
Նախագծով առաջարկվում է օբսիդիանի հանքարդյունահանման արտոնագրի պետտուրքը իջեցնել 10 մլն դրամից 100 հազար դրամ:
Լեւոն Զուրաբյանն առաջարկեց՝ 100 անգամ պետտուրքը իջեցնելու փոխարեն հանեիք պետտուրքն ընդհանրապես, սա ի՞նչ քաղաքականություն է. «4 հանք է, 400 հազար դրամ պետբյուջե: Հանեիք»:
Ըստ Զուրաբյանի, կառավարությունը շարժվում է կա՛մ փորձի եւ սխալի մեթոդով՝ արի 6 տարի փորձենք իջեցնենք պետտուրքը, կամ սա արվում է կոնկրետ մի արտադրողի համար, որը եկել է, ասել է՝ ժողովուրդ ջան, պետտուրքն իջեցրեք, ես գործ անեմ:
Կարդացեք նաև
Լեւոն Զուրաբյանն առաջարկեց, որ գոնե 3 տարի ժամկետ դնեն այդ պետտուրքի կիրառման վրա, որ հետո այնպես չստացվի՝ ինչ-որ մարդիկ փող են սարքում հանքերում, մենք էլ բանից անտեղյակ ենք:
Տնտեսական հարցերի հանձնաժողովի նախագահ Վարդան Այվազյանն էլ իր ելույթում դիտողություն արեց Զուրաբյանին. «Մի խոսեք խոսելու համար»:
Թե բյուջեի վրա նախագիծն ինչ ազդեցություն է թողնելու Վարդան Այվազյանը պատասխանեց. «Հիշեցի մի անեկդոտ, հարցնում են մեկին՝ ի՞նչ ես կերել, ասում է՝ հեչ, բա դո՞ւ ինչ ես կերել, ասում ա՝ վռիկ ապուր: Ասում է՝ բա դա ուտելո՞ւ բան է, ասում է՝ չեղավ-չեղավ, հեչ-ի չա՞փ էլ չեղավ: Պետբյուջեի մուտքը օբսիդիանի հանքերից մինչ օրս եղել է 0: Եթե էդ թիվը քեզ ոչ մի բան չի ասում, ուրեմն դա քեզ համար շատ հոգեհարազատ թիվ ա»: Մարդիկ չեն գնացել շահագործման, որովհետեւ շատ բարձր է եղել վճարը: 90-ականներին բնօգտագործման վճարը եղել է 50 հազար դրամ, էդ էլ ձեզ հիշեցնեմ»:
Հռիփսիմե ՋԵԲԵՋՅԱՆ
