Քաղաքացիական ակտիվիստ Գեւորգ Սաֆարյանի պաշտպան փաստաբան Տիգրան Հայրապետյանը միջնորդել է իր բողոքի քննությանը ապահովել նաեւ իր պաշտպանյալ Գեւորգ Սաֆարյանի ներկայությունը: «Շոշափվում է Գեւորգի քաղաքական գործունեությունը, Գեւորգ Սաֆարյանն էլ հայտարարում է, որ կալանավորված է իր քաղաքական հայացքների համար: Մեր կարծիքով, ճիշտ կլիներ, որ Գեւորգը դատարանին բացատրություններ տար ու նախագահող դատավորը Գեւորգից լսեր այն բոլոր հիմնավորումները, որոնք ներկայացրել ենք մեր բողոքում»:
Հիշեցնենք, որ Տիգրան Հայրապետյանը վերաքննիչ դատարանում բողոքարկում էր Գեւորգ Սաֆարյանի կալանքի ժամկետը երկարաձգելու վարույթ իրականացնող մարմնի որոշումը:
Փաստաբանի խոսքով՝ դատարանն այսօր բավարարել է իր միջնորդությունը՝ նիստը հետաձգելով մինչեւ մարտի 10-ը, ապահովելու Գեւորգ Սաֆարյանի ներկայությունը:
«Գեւորգ Սաֆարյանի գործն արդեն 4 դատավոր քննել է, սա 5-րդ դատավորն է ու քրեական իրավունքի մասնագետ: Առաջին անգամ նորմալ դատավորի վարույթում է գործը, դրա համար սպասելիքներ ունենք: Մխիթար Պապոյանը իսկապես լավ մասնագետ է»,- ասաց Տիգրան Հայրապետյանը:
Կարդացեք նաև
Նա քննադատեց նախորդ 4 դատավորների որոշումները, ասելով, որ որեւէ հիմք չլինելու հանգամանքում դատավորները փորձել են իրենց երեւակայության արդյունքում հիմնավորումներ նշել ու Գեւորգին զրկել ազատությունից: «Այս պարագայում եթե գործը քննում է քրեական իրավունքի մասնագետ, Գեւորգը պետք է ազատ արձակվի»:
Նրա խոսքով՝ այդ մասին ասում են ոչ միայն իրենք՝ պաշտպանական կողմը, այլեւ իրավապաշտպան կառույցները:
Արփինե ՍԻՄՈՆՅԱՆ
