Երեկ Լատվիայի մայրաքաղաք Ռիգայում մեկնարկեց Ազատ ոճի ըմբշամարտի Եվրոպայի առաջնությունը, որին Հայաստանի հավաքականը հանգամանքների թելադրանքով մասնակցում է մի փոքր փոխված՝ երիտասարդացված, կազմով:
Մեկնարկային օրը մեր հանրապետությունից մրցագորգ մտան երիտասարդ ըմբիշներ, 57 կգ քաշային Գարիկ Բարսեղյանը եւ 97 կգ քաշային Շամիր Աթյանը:
Բարսեղյանը մեկնարկային գոտեմարտում մոլդավացու նկատմամբ առավել քան համոզիչ հաղթանակ տանելուց հետո հաջորդ գոտեմարտում պարվեց բելառուսցի մրցակցին ու դուրս մնաց մեդալների համար պայքարից:
Շամիր Աթյանը պայքարը սկսեց 1/8 եզրափակչից եւ 10-0 հաշվով հաղթեց շվեյցարացի Լուկաս Ռիեսին, իսկ քառորդ եզրափակչում նույն հաշվով զիջեց Շամիլ Կուդիամագամեդովին: Եվ քանի որ ռուսաստանցին մտավ եզրափակիչ (նա ուշ երեկոյան նվաճեց նաեւ չեմպիոնի կոչումը), հայ ըմբիշը բրոնզե մեդալի համար պայքարելու հնարավորություն ստացավ: Սփոփիչ գոտեմարտում Շամիրը համառ պայքարում հաղթեց սլովակ մրցակցին, իսկ վճռորոշ մարտում պարտվեց աշխարհի կրկնակի չեմպիոն, ուկրաինացի Իբրահիմ Ալդատովին:
Կարդացեք նաև
Շամիր Աթյանի, ընդհանուր առմամբ, հաջող մասնակցության շնորհիվ Հայաստանի հավաքականն 1-ին օրվանից հետո թիմային հաշվարկով ընթանում է 5-րդ տեղում:
Աշոտ ՀԱԿՈԲՅԱՆ
