Թատրոնի միջազգային օրվան ընդառաջ՝ Գյումրու դրամատիկականում միջավայրն արքայական է, տրամադրությունը՝ շեքսպիրյան. Արթուր Սահակյանն ու աճեմյանցիները պատրաստվում են մարտի 27-ին դրամատիկականի վարագույրը բացել Շեքսպիրի «Լիր Արքա»-ով:
Տեւական դադարից հետո Գյումրու դրամատիկականում Շեքսպիր ունենալու որոշումը որքան սպասված, նույնքան էլ համարձակ էր քայլ էր. Արթուր Սահակյան ռեժիսորը, սակայն, որ աճեմյանական թատրոնի ներուժին հասցրել էր ծանոթանալ դեռ տարիներ առաջ արված բեմադրությունների միջոցով՝ գիտեր՝ Գյումրու թատրոնն ամեն ինչ ունի եւ կարող է նորից Շեքսպիր բեմ բարձրացնել եւ դա անել՝ նոր նշաձող սահմանելով թե՛ սեփական խաղացանկում, թե՛ ժամանակի հայ թատրոնի պատմության մեջ՝ ընդհանրապես:
Շուրջ մեկ տարվա ստեղծագործական աշխատանքից հետո «Լիր Արքա»-ն հանդիսատեսին առաջին անգամ կներկայանա մարտի 27-ին՝ կրկնակի տոնի վերածելով թատրոնի միջազգային օրը: Գյումրու դրամատիկականում վստահեցնում են՝ բեմ է բարձրանալու ծանրակշիռ ներկայացում՝ պատմական շնչով, ինքնատիպ բեմական լուծումներով, նկարչական եւ երաժշտական մանրակրկիտ մշակված ձեւավորմամբ ու աճեմյանցիներին վայել խաղով:
Կարդացեք նաև
Բոլոր ժամանակների համար գրված մարդկային ողբերգության շեքսպիրյան գլուխգործոցի գլխավոր դերում ՀՀ արվեստի վաստակավոր գործիչ Ռաֆայել Գրիգորյանն է, ռեժիսոր Արթուր Սահակյանի բնորոշմամբ՝ ամենալավ Լիրը, որին երբեւէ տեսել է բեմում: Լիր Արքան ու շեքսպիրյան հերոսներին մարմնավորող յուրաքանչյուր դերասան այս ներկայացումը քննություն է համարում՝ վստահեցնելով՝ ստեղծագործական այն միջավայրում, որտեղ աշխատում են, վատ ներկայացում ծնվել չէր կարող եւ ուրեմն մարտի 27-ին հանդիսատեսին սպասվում է թատերական հրավառություն՝ շեքսպիրյան շնչով…
Լիլիթ Թովմասյան
