Իրավապաշտպան Ավետիք Իշխանյանն այսօր Ընտրական օրենսգրքի շուրջ կազմակերպված հանրային քննարկման ժամանակ առաջարկեց. «Տարածքային ցուցակները ինձ համոզիչ չեն թվում: Կարելի էր ընդհանուր մի համամասնական ցուցակում պարտադիր լինեին տոկոսներ ըստ բնակչության թվի՝ տարբեր մարզերից: Որովհետեւ ի վերջո ԱԺ-ն քաղաքական մարմին է, տեղերից մարդիկ կարող էին այդ ձեւով լինել: Մատից փուշ հանելու տերմինն է ընդունված ասել, մատից փուշ հանողները տեղական ինքնակառավարման մարմիններն են, իսկ նա քաղաքական ուժ է: Այս տարբերակում մարզերից ամենավատ իմաստով հեղինակություն ունեցողների ուղղորդումն է լինելու»:
Կառավարության աշխատակազմի ղեկավար-նախարար Դավիթ Հարությունյանը պատասխանեց, որ Իշխանյանի առաջարկը հարցի լուծում չէ. «Մարզի բնակիչ լինելը, հաշվառված լինելը ոչինչ չի տալիս: Տալիս է, երբ մարզի բնակիչն ընտրություն է կատարում ինքնուրույն, երբ համարում է, որ այսինչ մարդը կարող է լավ բարձրացնել իր ձայնը խորհրդարանում: Միշտ կարելի է ենթադրել՝ բա որ մարզային մի հեղինակություն… Հավատացեք ինձ, չկա մարզային հեղինակություն, եթե կա՝ ցույց տվեք, որովհետեւ ես ծանոթ չեմ որեւէ մարզային հեղինակության»:
Ավետիք Իշխանյանը բարձրաձայնեց. «Գեներալ Մանվելը»: Դավիթ Հարությունյանն էլ պատասխանեց. «Գեներալ Մանվելը ես չեմ կարծում համարվում է մարզային հեղինակություն: Ազգային հերոս համաձայն եմ, բայց ոչ մարզային հեղինակություն»:
Հռիփսիմե ՋԵԲԵՋՅԱՆ
