«Իհարկե, դա մեր սեւ էջերից մեկն է: Իհարկե, այդ օրվա իշխանությունը միանշանակորեն պատասխանատվություն է կրում դրա համար: Իշխանությունը թույլ չպիտի տար, որ նման բան տեղի ունենար»,- խորհրդարանում լրագրողների հետ զրույցում ասաց ԲՀԿ խմբակցության պատգամավոր, նախկին արտգործնախարար Վարդան Օսկանյանն, որն արդեն հայտարարել է նոր կուսակցություն ստեղծելու մասին`պատասխանելով լրագրողների հարցերին` մարտի 1-ը Ձեզ չի՞ խանգարի, այդ օրվա Ձեր հայտարարությունը, այդ օրերին դուք իշխանության մեջ էիք…
«Ես այդ իշխանության մաս եմ եղել եւ հենց մարտի 1-ի օրը, խորհուրդ կտամ թարմացնել ձեր հիշողությունը, կա իմ ելույթը, որ կրակոցներից 3-4 ժամ առաջ է եղել… Ուղղակի օդում զգալով, որ լարված իրավիճակ է եւ նման զարգացումներ կարող են լինել, փորձել եմ կանխել: Ես շահեկանորեն տարբերում եմ մյուս քաղաքական գործիչներից, որ այդ պատասխանատվություն եմ վերցրել: Համարձակություն եմ ունեցել կանգնել կամերայի առաջ` կոչ անել`եւ հանրապետության նախագահին, եւ ընդդիմությանը, որպեսզի կարողանան երկխոսության մեջ մտնել, որպեսզի խուսափենք մարտի 1-ից»:
Լրագրողներից մեկը հարցրեց իր կուսակցության օրակարգում մարտի 1-ի բացահայտումը կլինի՞:
Կարդացեք նաև
«Իրավապահ մարմինները պիտի դրանով զբաղվեն: Բնականաբար աջակցություն կլինի: Որքան թափանցիկ լինեն նման հարցերը, այնքան լավ մեր հետագա զարգացումների համար»,- ասաց նա:
Նելլի ԳՐԻԳՈՐՅԱՆ
