«Այսօր ապրիլի մե՞կն է»,- սա ընդդիմադիր պատգամավոր Նիկոլ Փաշինյանի արձագանքն էր լրագրողի հարցին: Իսկ հարցը Վարդան Օսկանյանի այն հայտարարության մասին էր, իր կողմից ստեղծվող կուսակցության օրակարգում լինելու է 2008 թվականի մարտի 1-ի բացահայտումը:
«Եկեք չմոռանանք՝ ով ով է»,- ասաց Նիկոլ Փաշինյանը հեգնելով. «Վարդան Օսկանյանը, եթե նույնիսկ կուսակցություն բացի եւ որոշի նոտարով փոխել իր անուն- ազգանունը, դա չի նշանակում, որ ինքը Վարդան Օսկանյանը չէ, ով 2008 թվականի մարտի մեկին մահվան դատավճիռներ էր հրապարակում Բաղրամյան 26-ում»:
«Որեւէ մեկը չի մոռացվել`Վարդան Օսկանյանը, Արթուր Բաղդասարյանը, Սերժ Սարգսյանը, Տիգրան Թորոսյանը, Հովիկ Աբրահամյանը, Ռոբերտ Քոչարյանը, Սամվել Ալեքսանյանը, Գագիկ Ծառուկյանը… Սա գուցե քաղաքական լրջմիտ որոշում չէ, ես ինքս ինձ համար բացառում եմ, որեւէ համագործակցության ձեւ մարտի 1-ի ոճրագործների եւ նրանց սպասարկուների հետ: Օսկանյանին ես շատ ուղիղ դասում եմ եւ առաջին եւ երկրորդ խմբի մեջ, եւ իմ վերաբերմունքը այս առումով չի փոխվել»,- ասաց նա`հիշեցնելով, որ երբ որ 2012 թվականին Վարդան Օսկանյանին կալանավորելու որոշում էր կայացվել, դա առաջին կետն էր, երբ իրենք հակասություն ունեցան ՀԱԿ-ի հետ:
Նելլի ԳՐԻԳՈՐՅԱՆ
