«Թուրքիան չէր կարող առիթից չօգտվել: Թուրքական ղեկավարությունը ակնհայտ հայտարարում է, որ պետք է ազատագրել «այդ հողերը»: Թուրքիան ունի նաեւ պանթուրքիստական ծրագրեր, որոնց իրագործման ճանապարհին փոքր Հայաստանը ոսկոր է նրա կոկորդին: Ծրագրերը հնարավոր են այն դեպքում, երբ Հայաստանը չխանգարի: Հայաստանը կանգնած է Օսմանյան Թուրքիայի նկրտումների ճանապարհին»,-այսօր «Անալիտիկ» մամուլի ակումբում ասաց արտակարգ եւ լիազոր դեսպան Արման Նավասարդյանը` խոսելով Ադրբեջանի կողմից Արցախյան հակամարտությունը սրելու գործում Թուրքիայի ներգրավվածության մասին:
Դեսպանի խոսքով` Թուրքիայի նման քաղաքականությունը վտանգավոր է. «Պետք է պատրաստ լինել անակնկալների: 20 տարուց ավելի է` այս հարցը չի լուծվում: Ես էլ չեմ տեսնում, թե դիվանագիտական ինչ ճանապարհով կարելի է հասնել խնդրի կարգավորմանը: Ոչ նորմալ հակառակորդի հետ ոչ նորմալ իրադրություն է ստեղծվել»:
Արման Նավասարդյանը եւս փաստեց, որ Թուրքիայի կողմից ուղարկված ահաբեկիչները կռվում են Ադրբեջանի բանակի կազմում, ինչն ահազանգ է միջազգային հանրությանը:
Դեսպանը կարծում է, որ Ադրբեջանի նախահարձակ գործողություններն ինչ-որ տեղ Էրդողան-Պուտին լարված հարաբերությունների հետեւանքն են:
Կարդացեք նաև
Ինչ վերաբերում է Ռուսաստանի կողմից Ադրբեջանին զենք վաճառելուն, Նավասարդյանը նկատեց. «Շատ վատ է, որ զենք է վաճառում Ադրբեջանին, այդ զենքով էլ մերոնց են սպանում, բայց եթե Ռուսաստանը չգործի այս տարածաշրջանում, Հայաստանը ֆիզիկական վտանգի առաջ կկանգնի: Մյուս կողմից, ինչո՞ւ այդքան զենք վաճառելու ժամանակ մեր ականջները փակ էին: Հարցին այդ տեսանկյունից նայեք»:
Լուիզա ՍՈՒՔԻԱՍՅԱՆ
