«Ակնհայտ է, որ պատերազմը բարձր տեխնոլոգիական ոլորտի է անցնում»,- ապրիլի 7-ին Միջազգային եւ անվտանգության հարցերի հայկական ինստիտուտում կազմակերպված փորձագիտական կլոր սեղանի ընթացքում ասաց մեդիա փորձագետ Սամվել Մարտիրոսյանը:
Ըստ նրա, շատ կարեւոր է հասկանալ, որ պատերազմը դուրս է գալիս որակական նոր մակարդակի եւ վերանայելու խնդիրներ կան: Փորձը ցույց է տալիս՝ դա շատ ավելի դժվար կանխվող եւ հակառակորդների համար տնտեսապես ավելի օգտավետ միջոցներ են օգտագործվում: Սամվել Մարտիրոսյանի կարծիքով՝ եկել է ժամանակը նաեւ ներգրավելու մեր ՏՏ ոլորտի մասնագետներին. «Պետք է ավելի ակտիվ մտածել տեղեկատվական միջոցների կիրառմանը մեր սեփական ուժերով: Քանի որ կարծում եմ, որ մեր երկրում ՏՏ ոլորտն ունի մեծ ներուժ, եւ կարող է իր ներդրումն ունենալ»:
Քաղաքագետ Աղասի Ենոքյանը, անդրադառնալով տեղեկատվական պատերազմին, ասաց, որ իր կարծիքով՝ մենք տեղեկատվական պատերազմում պարտվում ենք: Նա որպես օրինակ բերեց միջազգային լրատվամիջոցներին, որոնց լրահոսում գերակշռում են ադրբեջանական կայքերից վերցրած տեղեկատվությունները. «Վերջերս եղավ «Save Kessab» ակցիան, որը շատ լայն, շատ արագ տարածվեց, հիմա մենք չենք կարողանում նման մի բան անել Ղարաբաղի համար: Չեմ հասկանում՝ ինչ եղավ մեզ հետ՝ կա՛մ «Save Kessab» ակցիան մենք չէինք անում, կա՛մ հիմա ուրիշ հարցերով շատ ենք զբաղված: Տեղեկատվական ակտիվության հետ լուրջ խնդիր ունենք, եւ ես կարծում եմ՝ սրա վրա պետք է մեր ուշադրությունը կենտրոնանա»:
Կարդացեք նաև
Ամի ՉԻՉԱԿՅԱՆ
