Մայրաքաղաքում բնակվող բազմազավակ և կարիքավոր 125 ընտանիքներ այսօր շնորհավորանքներ, ծաղիկներ ու դրամական աջակցություն են ստացել Երևանի քաղաքապետի և ՀՀԿ կանանց խորհրդի անունից: Բազմազավակ ընտանիքներին են այցելել ՀՀ ԱԺ փոխնախագահ, ՀՀԿ կանանց խորհրդի նախագահ Հերմինե Նաղդալյանը, Երևանի ավագանու ՀՀԿ խմբակցության անդամ Նաիրա Նահապետյանը և Երևանի քաղաքապետարանի սոցիալական ապահովության վարչության պետ Ռուզաննա Զաքարյանը: Բազմազավակ մայրերի հետ զրույցի ընթացքում հյուրերը նշել են, որ ապագայում ևս իշխանության տարբեր օղակների ներկայացուցիչները հնարավորինս սատարելու են կարիքավոր ընտանիքներին՝ օգնելով թեթևացնել բոլոր նրանց հոգսերը, ովքեր մեր օրերում չեն խուսափում լինել բազմազավակ մայր և հոգ տանել մեր ապագա սերունդի մասին:
Մայրերը շնորհակալություն են հայտնել անակնկալի, մշտական ուշադրության և հոգածության համար:
Երևանի քաղաքապետարան
Ե՞րբ պիտի բազմազավակ մայրերը ոչ թե խորհրդանշական գումարներ, ծաղիկներ ու գովասանագրեր ստանան, այլ իրենց հերոսությանն արժանի պարգևատրում: Որքա՞ն պիտի ազգովի սա հանդուրժենք, մինչև ե՞րբ թանկարժեք մեքենաներով, զարդերով, օծանելիքով, հագուստով ու նման թանկարժեք տներից եկած չինովնիկները պետության անունից մի քսան կամ հարյուր հազար դրամ “ողորմություն” տան բազմազավակ մայր կոչված կին-հերոսներին: Ե՞րբ պիտի այդ նույն հայ չինովնիկը հասկանա, որ այսօր,որ ինքը հերթական անգամ փրկվեց թուրք-ազերիների մորթից, բռնաբարությունից և այլն և այլն, դա այն բանի շնորհիվ է,որ նման կանայք հերթական բարդ որոշում են կայացրել՝ լույս աշխարհ բերել երեխա պետություն ներկայացնող չինովնիկների գրեթե խայտառակ ու հանցավոր անտարբերության պայմաններում: Դեռ չեն էլ ամաչում, էս տիպի հաղորդումներին որպես կանոն կցում են ինքնագովասանքի տողեր՝ “Մայրերը շնորհակալություն են հայտնել անակնկալի, մշտական ուշադրության և հոգածության համար”: