«Նոր ժամանակներ» կուսակցության նախագահ Արամ Կարապետյանը Aravot.am-ի հետ զրույցում չկարեւորեց երեկ Բաքվում ՌԴ Արտաքին գործերի նախարարի` Իլհամ Ալիեւի հանդիպման ժամանակ հնչեցրած ներածական խոսքը, որտեղ նա Վլադիմիր Պուտինի անունից ասել էր. «Նա, ի դեպ ամենաջերմ ողջույններն է հղում Ձեզ եւ հիշեցնում, որ Դուք հրավիրված եք Մոսկվա»:
Նա կարեւորեց ՌԴ նախագահի մամուլի խոսնակ Դմիտրի Պեսկովի այսօրվա այն հայտարարությունը, որ Ղարաբաղում իրավիճակը դեռ հեղհեղուկ է եւ այս վերջին բախումները բավականին հետ գցեցին փոխհամաձայնեցված այդ գործընթացը. «Մինչև այս թեժ բախումների վերսկսումը կային շատ լավ մշակումներ, արվել էին շատ դրական քայլեր կարգավորման ուղղությամբ, այժմ, ցավոք, տեղի ունեցավ ցատկ դեպի ետ, շատ առումներով հարկ կլինի այժմ ետ բերել բաց թողածը»:
Արամ Կարապետյանը բացատրելով, որ քաղաքականության մեջ դիվանագիտություն կա. «Մարդիկ կարող են իրար փաթաթվել, հետո հաջորդ օրը իրար դանակով խփել, ցավոք սրտի քաղաքականությունը, առավել եւս հիմա` այդպիսին է այն առումով, որ այս ամենը Ալիեւը արել էր ոչ թե ռազմական խնդիրների համար, այլ` քաղաքական»:
Պարոն Կարապետյանի կարծիքով, Լավրովի այցը հաշվի առնելով` Պեսկովը արտահայտում է կարծիք. «Այն քաղաքական նպատակները, որ շուտափույթ լուծում ստանար Ադրբեջանի օգտին հարցը, փաստացիորեն հիմա ասում են, որ դա չի կարող լինել, դա շատ կարեւոր բան է` ապագայում դուք էլ դա կզգաք, որովհետեւ սեղանին դրված առաջարկները մեզ համար ձեռնտու չի»:
Կարդացեք նաև
Նա, մեկնաբանելով հետագա գործողությունները` ասաց՝ եթե իհարկե այդ ամենը վերջանա նրանով, ինչպես հիմա այդ գործընթացը գնում է. «Չէ՞ որ Ադրբեջանը այդ ամենը արել էր աշխարհին ցույց տալու, որ եթե դուք չստիպեք Հայաստանին զիջումների գնալ` կսկսեմ լայնածավալ պատերազմ ու կարող եմ պատերազմել: Իսկ հիմա առաջին համանախագահող երկիրը, համենայն դեպս, ասում է ընդհակառակը` գործընթացը հետ գցեցիր այդ գործողություններով»:
Անուշ ՄԱԹԵՎՈՍՅԱՆ
