Հալաբյան փողոցում ավտոբուսի պայթյունից տուժած քաղաքացիներից Հարություն Թերզյանն այս պահին «Արմենիա» բժշկական կենտրոնում է: Նրան այսօր տեղափոխեցին նույն հիվանդանոցի քիթ-կոկորդի բաժանմունք:
Ականջի վիրաբուժության կենտրոնի ղեկավար Գարեգին Միրաքյանը մեզ հետ զրույցում ասաց, որ Թերզյանը պայթյունից կոնտուզիա է ստացել:
Երբ Հարություն Թերզյանին տեղափոխեցին հիվանդասենյակ, մենք փորձեցինք փոքրիկ զրույց ունենալ նրա հետ: Թեեւ շատ բան չպատմեց, բայց ասաց, որ ավտոբուսում նախավերջին նստարանին է նստած եղել, եւ լավ չի հիշում, թե պայթյունը որտեղից եղավ. «Ավտոբուսը միանգամից հոսանքազրկվեց, մեջը մառախուղ եղավ ու պայթեց»:
Թերզյանն ասաց, որ ուշքի գալուց հետո զգացել է, որ ամբողջովին արյան մեջ է, հետո մարդիկ են մոտեցել նրան ու օգնել:
Կարդացեք նաև
«Գնացի էն աշխարհ, հետ եկա, Աստված երեւի կյանքս խնայեց: Պայթյունից հետո ուշքի եկա, ինձ թվաց՝ հեսա ուր որա է՝ կմեռնեմ, բայց վերականգնվեցի»,-պատմում է Թերզյանը:
Ականջի միկրովիրաբույժ Գարեգին Միրաքյանն ասաց, որ Թերզյանի մոտ կոնտուզիայի հետեւանքով ականջի թմբկաթաղանթի բավականին մեծ պատռվածք կա, որի դեպքում սովորական ժամանակ կատարում են վիրահատություն.«Մենք այսօր զննումը կկատարենք, լսողությունը կստուգենք, ըստ այդմ, կորոշենք, թե ինչ վիրահատություն պետք է անենք՝ փոքր վիրահատություն, մեծ, թե՝ միջին: Վիրահատությունը պարտադիր է»:
Նելլի ԲԱԲԱՅԱՆ
