Աշխատավորների միջազգային օրվա՝ մայիսի 1-ի առթիվ աշխատանքային իրավունքների մասին Aravot.am-ը փաստաբան Տիգրան Սարգսյանից հետաքրքրվեց, թե ինչպես պետք է աշխատողը պահպանի իր աշխատանքային իրավունքը. «Աշխատողների իրավունքները հնարավոր է պաշտպանել, եթե առկա է աշխատանքային պայմանագիր: Աշխատանքային պայմանագիր կնքելով` կարելի է բազմաթիվ իրավախախտումներ կանխարգելել: Աշխատանքային պայմանագիրը նաեւ բարձրացնում է աշխատողի հավատը դեպի գործատուն, ինչն էլ նպաստում է աշխատողի նվիրվածությանը եւ ոգևորվածությանը դեպի աշխատանքը»:
Մեր այն հարցին էլ, թե հնարավո՞ր է, որ չձեւակերպված աշխատողը պահանջի կնքել պայմանագիր եւ վճարվել չվճարված ժամանակահատվածի համար, եթե գործատուն նրա հետ նախապես պայմանագիր չի կնքել, փաստաբանը պատասխանեց, որ եթե քաղաքացին աշխատում է առանց պայմանագրի կամ աշխատանքի ընդունվելու հրամանի, ապա իր աշխատանքային կարգավիճակը և իրավունքները հաստատելու համար կարող է դիմել դատարան ինչպես փաստացի աշխատանքային հարաբերությունների մեջ գտնվելու ընթացքում, այնպես էլ աշխատանքային հարաբերությունները դադարեցնելուց հետո` մեկ տարվա ընթացքում. «Եթե դատարանը հաստատված համարի, որ կողմերի միջեւ աշխատանքային հարաբերություններ են եղել, ապա աշխատանքային հարաբերությունները համարվում են ծագած, եւ աշխատավարձի հաշվարկը պետք է կատարվի փաստացի աշխատանքը սկսելու պահից»,- ասաց փաստաբանը:
Անուշ ՄԱԹԵՎՈՍՅԱՆ
