Լեռնային Ղարաբաղի Հանրապետության Ազգային ժողովի պատգամավոր Վարդգես Բաղրյանը Aravot.am-ի հետ զրույցում կարեւորեց այն հանգամանքը, որ «Հայկական քաղաքական կուսակցությունների երկրորդ ֆորումը» տեղի է ունենում ապրիլյան պատերազմից հետո:
«Բնականաբար, քննարկումների հիմնական թեման հենց դա էր: Եվ նաեւ թե՛ Հայաստանի, թե՛ Արցախի քաղաքական կուսակցությունների անելիքները, հետեւությունները այդ պատերազմից, եւ նրանց առաջիկա անելիքները: Ինչպես մեր կուսակցության, կարծում եմ նաեւ բոլոր քաղաքական ուժերի համար այս օրերին համախմբված են ինչպես ամբողջ ազգը, եւ փառք աստծո, Արցախի հարցում լուրջ տարաձայնություններ չկան»,- ասաց նա:
Վարդգես Բաղրյանը նշեց, որ նաեւ առաջարկվել է, որպեսզի արցախյան կուսակցությունները ակտիվացնեն իրենց գործունեությունը եւ ընդգրկվեն տարբեր միջոցառումների, որպեսզի աշխարհը ճշգրիտ տեղեկատվություն ստանա, թե իրականում ինչ են ուզում արցախցիները եւ ինչ իրավիճակ է Արցախում:
Նա ընդգծեց, որ ֆորումի ընթացքում առավել ակտիվ էին հայաստանյան կուսակցությունների ներկայացուցիչները, եւ ըստ նրա, քննարկման ընթացքում «բոլորս միասնական ուժերով պետք է շարունակենք պայքարել Արցախի համար» կարծիքին հակառակ կարծիք չի հնչել:
Վարդգես Բաղրյանը, սակայն, նկատեց, որ Հայաստանից ոչ բոլոր կուսակցություններն էին մասնակցում ֆորումին, օրինակ՝ Ժառանգությունը, ՀԱԿ-ը ներկա չէին. «Կարծում եմ, որ ինչպիսի տարաձայնություններ էլ լինեն քաղաքական ուժերի միջեւ, սա այն հարթակն է, այն հնարավորությունն է, որտեղ բավականին անկեղծ զրույց եղավ: Շատ առարկայական, ինչ-որ տեղ նաեւ սուր ելույթներ եղան նաեւ մեր բացթողումների մասին, անելիքների մասին: Այնպես որ մենք դեռ շատ անելիքներ ունենք այս իրավիճակից դուրս գալու համար, առաջիկա մարտահրավերներին դիմակայելու համար»:
Կարդացեք նաև
Ամի ՉԻՉԱԿՅԱՆ
